Sərhəd pozucuları xeyli miqdarda narkotik maddəni ataraq qaçıblar. Hadisə Cəlilabad rayonunda, İranla sərhəd ərazidə baş verib. Baş Mütəşəkkil Cinayətkarlıqla Mübarizə İdarəsinin əməkdaşları isə civə satmaq istəyən bir nəfəri saxlayıb.

Cəlilabadın Surxanlı kəndində külli miqdarda narkotik vasitənin ölkəyə gətirilməsinin qarşısı alınıb. İrandan Azərbaycana hərəkət edən 2 nəfər sərhəd naryadının qanuni tələb və xəbərdarlığına məhəl qoymayaraq havanın qaranlıq olmasından istifadə edərək geriyə qaçmağa müvəffəq olub. Sərhəd pozucularının hərəkət marşrutuna baxış keçirilərkən ərazidə külli miqdarda narkotik maddə - 5 kiloqrama yaxın kakos və 2 kiloqram tiryək aşkar olunaraq götürülüb.
Salyan rayonunda isə narkotik satışından pul qazanmaq istəyənlər məsuliyyətdən yaxa qurtara bilməyiblər. Rayon Polis Şöbəsi əməkdaşlarının həyata keçirdikləri əməliyyat-axtarış tədbirləri nəticəsində şəhər sakini Rəşadət Əzizovdan və Ağdaş rayon sakini, əvvəllər məhkum olunmuş Zöhrab Əhmədovdan 4 kiloqram 785 qram tiryək götürülüb. İbtidai istintaq zamanı həmin şəxslər narkotik vasitəni müəyyən məbləğə satmaq istədiklərini, bir hissəsini isə şəxsi istifadələri üçün saxladıqlarını etiraf ediblər. Hazırda həmin şəxslərin narkotiki hardan və necə əldə etdikləri araşdırılır.
Baş Mütəşəkkil Cinayətkarlıqla Mübarizə İdarəsi əməkdaşlarının həyata keçirdikləri əməliyyat-axtarış tədbirləri nəticəsində isə Bakı şəhər sakini Elxan Baxşıyev tutulub. O, 1 kiloqram 297,9 qram civəni 4000 manata satmaq istəyirmiş. Elxan zəhərli maddəni şərti alıcı qismində əməliyyatda iştirak edən şəxsə satarkən elə iş başında yaxalanıb.

Hazırda hər üç faktla bağlı Cinayət Məcəlləsinin müvafiq maddələri ilə cinayət işi açılıb.

http://kepeztv.az