Sumqayıt polisi 2 narkotik vasitə istifadəçisini saxlayıb. Onların birindən marixuana, digərindən isə heroin aşkarlanıb. Balakəndə isə narkotik vasitəni satan şəxslər həbs olunub.

Sumqayıt şəhər polis idarəsi əməkdaşlarının həyata keçirdikləri tədbirlər nəticəsində narkotiklərin qanunsuz dövriyyəsində şübhəli bilinən şəxs ələ keçib. 56 yaşlı Adəm Abbasovun üzərinə baxış keçirilərkən 470 qram narkotik vasitə olan qurudulmuş marixuana aşkar edilərək götürülüb. Saxlanılan şəxs narkotik vasitəni Bakı Beynəlxalq Avtovağzalında tanımadığı şəxsdən öz istifadəsi üçün aldığını bildirib.

Sumqayıt polisi Corat qəsəbə sakini, 34 yaşlı İlqar Dadaşovu da özünü şübhəli apardığı üçün saxlayıb. Onun üzərinə baxış keçirilərkən narkotik vasitə olan heroin aşkarlanıb. Narkotik aludəçisi olduğunu deyən İlqar Dadaşov heroini öz istifadəsi üçün aldığını bildirib.

Balakəndə isə narkotik vasitələrin dövriyyəsi və kultivasiyası ilə məşğul olan şəxslər saxlanılıb. Daxili İşlər Nazirliyinin Baş Cinayət-axtarış İdarəsi və Balakən Rayon Polis Şöbəsi əməkdaşlarının birgə keçirdiyi əməliyyat tədbirləri nəticəsində ilk olaraq Balakən sakinləri Tural Nəsibov və Şimşək Allahyarov saxlanılıblar. Həmin şəxslər 480 qram qurudulmuş marixuananı 2000 manat müqabilində şərti alıcıya satmaq istəyirmişlər. Turalın üzərinə baxış keçirərkən 14 qram qurudulmuş marixuana aşkar edilərək götürülüb. Həmin narkotik vasitəni Turala verməkdə şübhəli bilinən rayonun Talalar kənd sakini Sarıyev İlqar da saxlanılıb. Onun üzərindən 9 qram qurudulmuş marixuana, yaşadığı evdən isə xüsusi qulluq edilən 73 ədəd çətənə şitilləri aşkar edilərək maddi sübut kimi götürülüb.

Bütün faktlarla bağlı cinayət işi açılıb, araşdırmalar davam etdirilir.

kepeztv.az