Ağstafada ata 6 yaşlı oğlunu öldürüb (Yenilənib)

Tüfeyli həyat tərzi keçirən ata övlad qatili olub. Dəhşətli hadisə ötən gecə Ağstafanın Qırılı kəndində baş verib. 3 yaşlı bacısı ilə həyətdə oynayan 6 yaşlı Şəmistan, atasının qəzəbinə tuş gəlib. Ağac parçası ilə onu ölümcül döyən Famil Pərvanəyev evində yaşadığı qaynanasını da vurub.

Kənd sakini: “Uşaqlar həyətdə oynayırmış. Öz aralarında nə isə olub, uşaqdırlar də... Nə edirlər etsinlər, ayıb deyilmi, sən niyə uşağı elə vurursan? Ata da uşağı elə döyərmi?! Əsəbiləşmisən, bir sillə vur”.

6 yaşlı uşağın nənəsi onu atasının əlindən alaraq həyatını qurtarmağa çalışsa da, buna nail ola bilməyib.

Məhəmməd Musayev- zərərçəkənin qohumu: “Gələndə gördüm ki, uşaq nənəsinin qucağındadır. Soruşdum ki, nə olub? Dedi uşaq ölür. Dedim tez aparın bizə. Əvvəlcə fonendeskopla yoxladım, gördüm ürəyi döyünür. İlk yardım üçün iynə vurmaq istədim, amma gec oldu - uşaq keçindi”.

Kənd sakinlərinin sözlərinə görə, Famil Pərvanəyev Qazax sakinidir. Bir neçə il öncə birinci ailəsindən ayrılaraq Qırılı kəndinə gəlib və ikinci dəfə ailə qurub.

Məhəmməd Musayev- zərərçəkənin qohumu: “Qaynanasının 47 manat pensiyası ilə dolanan adamdır. 4-5 aydır ki, işləmir. Neçə dəfə demişəm, oğul, iş tap, belə olmaz. Dəfələrlə yoldaşını döyüb”.

Baş verən hadisə ilə bağlı araşdırmalar davam etdirilir.

kepeztv.az