Bakıda itin hürməyinə görə, sahibi bıçaqlanaraq qətlə yetirilib. Qanlı olay paytaxtın mərkəzi küçələrinin birində baş verib.

İlkin məlumata görə, gənclər arasında yaranan mübahisə bıçaqlanma ilə nəticələnib. Gənclərdən biri digərinin boğazını kəsib, onun dostunu isə yaralayıb. 25 yaşlı Həsən Həsənov hadisə yerindəcə dünyasını dəyişib. Onun dostu 21 yaşlı Təbriz Məmmədzadə bıçaq yarası ilə Klinik Tibbi Mərkəzə çatdırılıb.
Qətli törədənin şəxsiyyəti isə hələ ki, məlum deyil. O, qanlı hadisəni törətdikdən sonra ərazidən uzaqlaşıb. Hüquq mühafizə orqanlarının əməkdaşları hadisə yerində araşdırmalar aparıblar. İki nəfəri bıçaqlayan şəxsin axtarışları davam etdirilir.

Hadisənin motivinə gəlincə şahidlər bildiriblər ki, qətlə yetirilən Həsən Həsənov Sahil Bağında itini gəzdirirmiş. İt yaxınlıqdan keçən naməlum şəxslərə hürməyə başlayıb və tərəflər arasında bu səbəbdən mübahisə başlayıb. Nəticədə qanlı hadisə baş verib. Lakin istintaq hadisə şahidlərinin ifadəsinə əsaslanan bu versiyanı qətlin rəsmi səbəbi kimi təsdiq etmir. Səbael rayon prokurorunun köməkçisi Mirfariz Seyidəliyev bildirib ki, qətlin əsl motivi hadisəni törədən şəxsin tapılmasından sonra bəlli olacaq.

Faktla bağlı Səbael rayon Prokurorluğunda cinayət məcəlləsinin qəsədən adam öldürmə maddəsi ilə cinayət işi başlanıb, araşdırma aparılır.

kepeztv.az