Gəncədə dayı bacısı qızını öldürüb. Bakıda isə arvadını qətlə yetirən ər yaxalanaraq istintaqa təhvil verilib.

Gəncədə dəhşətli qətl hadisəsi baş verib. Azərbaycan Dövlət Dəmir Yolları Qapalı Səhmdar Cəmiyyətinin 4 saylı Enerji Təchizat Stansiyasının əməkdaşı 47 yaşlı Kifayət Əhmədova iş yerində dayısı, 77 yaşlı Qəzənfər İsgəndərov tərəfindən bıçaqlanıb. Ağır bədən xəsarətləri alan qadın Gəncə şəhər Təcili Tibbi Yardım Xəstəxanasına çatdırılsa da, onun həyatını xilas etmək mümkün olmayıb. Məhkəmə Tibbi Ekspertiza və Pataloji Anatomiya Birliyinin Gəncə şəhər Şöbəsində müayinə olunan qadına bir neçə bıçaq zərbəsi vurulduğu aşkar edilib. Faktla bağlı şəhər Baş Polis İdarəsində araşdırma aparılır. Qətlin hansı zəmində baş verməsi hələ ki, məlum deyil.

Bakıda isə 2 gün öncə qətl törətməkdə şübhəli bilinən şəxs yaxalanıb. Yasamal Rayon Polis İdarəsindən verilən məlumata görə, həyata keçirilən əməliyyat-axtarış tədbirləri nəticəsində həyat yoldaşı, Fatma Şəfiyevanı qətlə yetirməkdə təqsirləndirilən Namiq Məmmədov tutulub. Qeyd edək ki, hadisə aprelin 8-də gecə saatlarında Xırdalan-Bakı xətti üzrə hərəkət edən 135 saylı sərnişin avtobusunda baş verib. N. Məmmədov aralarında yaranan münaqişə zəminində həyat yoldaşı F. Şəfiyevanı bıçaqlayaraq qətlə yetirib.

kepeztv.az