Şəmkirdə toy məclisində 20 yaşlı gənci bıçaqlayan şəxsin kimliyi məlum olub. Aparılan istintaq tədbirləri çərçivəsində 28 yaşlı rayon sakini tutulub. Bakıda da mübahisə qanla bitib.

Şəmkir rayonunda keçirilən toy məclislərinin birində qanlı olay baş verib. Hadisə şəhərin Nizami Gəncəvi küçəsində fəaliyyət göstərən şadlıq saraylarının birində qeydə alınıb. Toy məclisində birgə yeyib-içən həmyerlilər sərxoş olduqdan sonra yersiz mübahisəyə başlayıblar. Uzun sürən mübahisə rayon sakini 20 yaşlı Ağaxan Abdullayevin çoxsaylı bıçaq xəsarətləri alması ilə yekunlaşıb. Yaralı dərhal Şəmkir Mərkəzi Rayon Xəstəxanasına çatdırlıb onun vəziyyəti orta-ağır kimi qiymətləndirilir.

Aparılan istintaq tədbirləri nəticəsində hadisəni 28 yaşlı rayon sakini Ramin Adıgözəlovun törətdiyi müəyyən edilib. Əməliyyat tədbirləri ilə adıçəkilən şəxs tutularaq istintaqa təhvil verilib.

Bakıda da mübahisə bıçaqlanma ilə sonlanıb. Bu dəfə 23 yaşlı gənc bıçaqlanıb. Qanlı olay paytaxtın Nəsimi rayonu Rəşid Behbudov küçəsində qeydə alınıb. Şəhər sakini Etibar Mehdiyev qarnının ön divarının kəsilmiş-deşilmiş yarası ilə xəstəxanaya gətirilib. O, dərhal əməliyyat edilib və reanimasiya şöbəsinə yerləşdirilib. Nəsimi polisi tərəfindən aparılan istintaq tədbirləri nəticəsində hadisənin Quba rayon sakini 23 yaşlı Maarif Dəmirov tərəfindən törədildiyi müəyyən edilib. Həmin şəxs saxlanılaraq istintaqa təhvil verilib.

Bütün faktlarla bağlı cinayət işi açılıb araşdırmalar davam etdirilir.

http://kepeztv.az