Abşeron rayonunda oğurluq hadisəsi baş verib. Ev sahibinin evdə olmamasında istifadə edən oğrular evdən 6 min manat dəyərində qızıl və nağd pul aparıblar. Bakıda isə 20-yə yaxın avtomobildən oğurluq edən şəxs məsuliyyətə cəlb olunub.

Naməlum şəxs və ya şəxslər Xəlil Rza küçəsi, 94 ünvanında yaşayan Bəhman Novruzovun ailəsinin yas mərasimində olmasından istifadə edərək evdən oğurluq ediblər.

Oğrular evin həyətinə hasardan aşaraq daxil olublar. Evə isə pəncərədən giriblər. Bundan sonra oğrular evin otaqlarında pul və qızıl axtarmağa başlayıblar.

Zərərçəkənlərin sözlərinə görə, bu, onların evində baş verən ilk oğurluq hadisəsi deyil. Bir il əvvəl də onların evləri qarət edilib.

Faktla əlaqədar Abşeron rayon Polis İdarəsində cinayət işi başlanıb. Hadisəni törətməkdə şübhəli bilinən şəxs və ya şəxslərin axtarışları davam edir.

Paytaxtın Xətai rayonunda isə avtomobillərə qənim kəsilən şəxs saxlanılıb. Saxlanılan şəxsin 20-yə yaxın avtomobildən oğurluq etdiyi aşkar olunub. Bakı şəhər sakini Elnur Hüseynov Xətai rayonu, Zığ yolu, ev 42-nin qarşısında “KİA” markalı avtomobilindən şüşəni sındırmaq yolu ilə 6 ədəd bankomat kartı və geyim əşyası oğurlanması parədə polisə məlumat verib. Xətai rayon polis idarəsinin əməliyyatçıları tez bir zamanda həmin cinayəti törətməkdə şübhəli bilinən paytaxt sakini 35 yaşlı Samir Babayevi saxlayaraq istintaqa təhvil veriblər. Onun üzərinə baxış keçirilərkən narkotik vasitə olan heroin də aşkarlanaraq götürülüb. Samir Babayevin ətrafında aparılan əməliyyat tədbirləri nəticəsində onun silsilə oğurluqlar törətməsi üzə çıxıb.

3 ilə yaxındır ki, narkotik aludəçisi olduğunu deyən Samir oğurluqları da məhz narkotikə olan tələbatını ödəmək üçün etdiyini söyləyib.

Bu fakt üzrə də Cinayət Məcəlləsinin müvafiq maddəsi ilə cinayət işi başlanıb. Saxlanılan şəxsin oxşar cinayətlərdə iştirakının olub-olmaması araşdırılır.

http://kepeztv.az