Xaçmazda qohumlar arasında yaranan mübahisə qanlı sonluqla nəticələnib. 24 yaşlı gənc xalası oğlu tərəfindən bıçaqlanıb. Hacıqabulda isə aşpaz baltalanıb.

Xaçmaz şəhərinin Zeynəddin Babayev küçəsində 24 yaşlı Kamran Hacıbalayev bıçaqlanıb. O, təcili tibbi yardım vasitəsilə Xaçmaz Mərkəzi rayon Xəstəxanasına çatdırılıb. Cərrahiyyə şöbəsinə yerləşdirilən yaralı əməliyyat olunub, vəziyyəti orta-ağırdır. Hadisə Kamran Hacıbalayevin anası Bəturə Hacıbalayevanın gözləri qarşısında baş verib. O, bildirib ki, Kamran xalası oğlu 19 yaşlı Eldar Tamirov və xalası Pəricahan Tamirova tərəfindən döyülüb. Bu zaman Eldar Tamirov Kamran Hacıbalayevin kürək nahiyəsindən bir bıçaq zərbəsi endirirək hadisə yerindən uzaqlaşıb. Faktla bağlı Xaçmaz rayon Polis Şöbəsində əməliyyat-istintaq qrupu yaradılıb. Hadisəni törətməkdə təqsirli bilinən Eldar Tamirov və Pəricahan Tamirova saxlanılaraq istintaqa təhvil veriliblər.

Hacıqabul rayonunun Nəvahi qəsəbəsində də bənzər hadisə baş verib. Kafelərdən birində qəsəbə sakini, əvvəllər məhkum olunan Şahin Əsgərov xuliqanlıq zəminində orada aşpaz işləyən İsmayıllı şəhər sakini Rövşən Nurməmmədovun baş nayihəsinə balta ilə xəsarət yetirib. Nəticədə sonuncu yaxınlıqdakı xəstəxanalardan birinə aparılıb və vəziyyətinin orta-ağır olduğu deyilir. Hacıqabul Rayon Polis Şöbəsinin əməkdaşlarının həyata keçirdikləri əməliyyat-axtarış tədbirləri nəticəsində Şahin Əsgərov tutulub. Hazırda hadisənin hansı səbəbdən baş verdiyi araşdırılır.

Hər iki faktla bağlı Cinayət Məcəlləsinin müvafiq maddəsi ilə cinayət işi açılıb.

http://kepeztv.az