Xalq artisti, Azərbaycan Bəstəkarlar İttifaqının sədri Firəngiz Əlizadənin toy müğənnilərinin efirə çıxarılmasına qadağa qoyulması barədə səsləndirdiyi fikirlər birmənalı qarşılanmayıb. Bəzi sənət adamları onun düşüncələrinə qoşulsa da, xalq artistinin fikirlərinə qarşı çıxanlar da az olmayıb. Bir çox müğənni gəlirinin toydan olduğunu bildirib və bu cür addımı haqsızlıq adlandırıb.

Bəs, Mədəniyyət Nazirliyi müzakirələrə səbəb olan mövzu ilə bağlı hansı addımı atacaq? Həqiqətən, toy müğənnilərinin efirə çıxarılması qadağan ediləcəkmi?

Musavat.com mövzu ilə bağlı Mədəniyyət Nazirliyinin mətbuat sözçüsü İntiqam Hümbətovla əlaqə saxlayıb.

O, saytımıza açıqlamasında bildirib ki, müğənnilərin efirə çıxması ilə bağlı bir çox tədbirlər görüləcək: “Prezident İlham Əliyev ilə incəsənət xadimlərinin görüşündə televiziyaların durumu barədə məlumat verildi. Televiziyalarla bağlı prezident tapşırıq verib. Mədəniyyət Nazirliyi də daxil olmaqla bir neçə qurum bu məsələ ilə bağlı tədbirlər görəcək. Artıq təkliflər planı hazırlanır, tezliklə ictimaiyyətə təqdim olunacaq”.

İ.Hümbətov son günlər müğənnilərin qalmaqallarla gündəmə gəlməsi və bir-birini təhqir etməsinə isə belə münasibət bildirib: “Nazir Əbülfəs Qarayev ilə jurnalistlərin görüşündə müğənnilərin mədəniyyəti, davranışı barədə sual ünvanlamışdı. O da öz fikirlərini bölüşmüş, məsləhətlərini vermişdi. Nazirin məsləhətlərinə kimisi əməl edir, kimisi etmir”.