Bakı Şəhər Baş Polis İdarəsi teleaparıcı Tarix Əliyevin (Tolik) polis haqqında iddialarına cavab verib.
İdarənin mətbuat xidmətinin rəhbəri, polis mayoru Elşad Hacıyev Trend-ə açıqlamasında bildirib ki, sosial şəbəkələrdə, bəzi internet saytlarında teleaparıcı Tarix Əliyevin “Binəqədi rayon icra hakimiyyəti tərəfindən vətəndaşın mənzilinə göndərilən polislərin onlarla kobud rəftar etməsi” ilə bağlı iddialar səsləndirib: "Bu barədə Bakı şəhər BPİ-nin Mətbuat Xidmətinin rəisi, polis mayoru Elşad Hacıyev bildirib ki, tərəfimizdən videomaterial araşdırılıb, orada əks olunan kadrlarda polis əməkdaşlarının iştirakı müşahidə olunmur: “Polisə qarşı irəli sürülən ittihamlar və səslənən iddialar yalandır, əsassızdır”.

E.Hacıyev əlavə edib ki, qeyd edilənləri nəzərə alaraq, polisin adı hallanan məlumatları hazırlayarkən paytaxt üzrə Bakı Şəhər Baş Polis İdarəsi ilə dəqiqləşdirilmə aparılmaqla yayımının təmin olunması jurnalistlərə tövsiyə edilir. Bu davranış tək polisin yox, eyni zamanda cəmiyyətin maraqlarına xidmət edir.

Qeyd edək ki, Tolik polislə bağlı görüntüləri sosial şəbəkədə paylaşaraq, onların ünvanına sərt sözlər ünvanlamışdı:
"Bu "Qaqaş" kimdi belə vətəndaşa deyir ki, "telefonu çək kənara” və hədə-qorxu gəlir?! Bu "Qaqaş" hansı məmur dayısına güvənir hə? Binəqədi rayon İcra Hakimiyyəti bir kasıbın tikdiyi nərdivanı sökməyə bu qədər adam göndərib? Bəlkə, Binəqədidə hektarla yer zəbt etmiş harınlamışların evlərinin kənarına baxsın! Cənab Daxili İşlər naziri dünən açıqlamasında deyib: "Vətəndaşlarla yaxşı davranın!!!”

Sən kimə güvənib belə danışırsan?! İndi çıx ortalığa cavab ver! Bunlar "SOCAR”ın işçiləridir. Bunlar nə haqla vətəndaşa "sök” deyir?! İndi bu qoçuların adamı gəlsin mənə desin ki, "sil bu videonu”. Belələri işdən çıxmalıdır!”