Ötən il dekabrın 7-də Dövlət Təhlükəsizlik Xidmətinin əməkdaşları tərəfindən həbs edilən Cəlilabadın sabiq icra başçısı Namiq Zeynalovun həbs müddəti hələ ki, uzadılır.

İndi ancaq dərdi dəmir barmaqlıqlar arasından çıxmaq olan sabiq icra başçısının rayonda ən çox qalmaqala səbəb olan biznesi “TIR” parkı olub. N.Zeynalovun həbsindən sonra bir müddətdir ki, mal-heyvan otlağına çevrilən park yenidən işə salınıb.

Rayonda olan mənbəmiz bildirir ki, N.Zeynalovun “sağ əli” kimi tanınan Fuad adlı şəxs kartof sezonu vaxtı çatdığından parkı işə salmaq üçün döymədiyi qapı qalmayıb. Cəlilabad Rayon İcra Hakimiyyəti parkın fəaliyyətinin bərpa edilməsinə tərəddüd etsə də, sonradan razılıq verib.

Qeyd edək ki, adı çəkilən “TIR” parkına rəhbərlik edən Fuad adlı şəxs rayonda “Tut bağı” və “Okean” kafelərini də işlədir. Onun Cəlilabadın keçmiş icra başçılarından olan Əziz Əzizovla da yaxın münasibətləri olduğu bildirilir.

Yay aylarında kartof sezonu vaxtı isə bu dayanacaqda 100-150 “TIR” park edilir. Onların hər biri isə dayanacaqdan çıxarkən 60 AZN yer haqqı ödəyir. “TIR”lar yay aylarında Cəlilabadın kəndlərindən Rusiyaya kartof daşıyır. “TIR” parkının yenidən işə salınmasına razılıq verən məmurun isə kimliyini rayondakı mənbəmiz araşdırır. //moderator.az//