Kommunistlərin bu il dekabrın 23-də keçiriləcək bələdiyyə seçkilərində namizədliyinin qeydə alınması davam edir.Bu barədə mətbuata Azərbaycan Kommunist Partiyası Mərkəzi Komitəsinin katibi Ədalət Abdinov məlumat vermişdir.

Onun sözlərinə görə , partiyada aparılan müzakirələr əsasında rayon partiya komitələrinin bələdiyyələrə namizədlərin irəli sürülməsi barədə təklifləri Azərbaycan Kommunist Partiyası Mərkəsi Komitəsinin büro iclasında təsdiq olunmuşdur. Azərbaycan Kommunist Partiyası Mərkəzi Komitəsinin bələdiyyələrə namizədlərin irəli sürülməsi barədə iclasının qərarı və protokolu, eləcə də MK Katibliyi tərəfindən Seçki Məcəlləsinin tələblərinə uyğun olaraq hazırlanmış müvafiq seçki sənədləri, o cümlədən partiya tərəfindən irəli sürülmüş namizədlərin uygun dairə seçki komissiyalarına təqdim edəcəyi sənədlər rayon və şəhər partiya komitələrin birinci katiblərinə təqdim edilmişdir.

Namizədlərin qeydə alınması məsələsinə gəldikdə, Ədalət Abdinov bildirmişdir ki, Azərbaycan Kommunist Partiyasının bələdiyyələrə namizədlərinin dairə seçki komissiyalarına irəli sürülməsi, imzaların toplanması və digər sənədlərin hazırlanması, ümumiyyətlə namizədlərin qeydə alınması təmin edilir. Partiyanın yerli strukturlarının qarşıda duran vəzifələrin yerinə yetirilməsi məqsədilə səfərbər edilməsi, irəliyə sürülən namizədlər üçün treninqlərin təşkil edilməsi də müsbət nəticəsini verəcəkdir.

Ədalət Abdinov əmin olduğunu bildirmişdir ki, Azərbaycan Kommunist Partiyasının növbəti bələdiyyə seçkilərində irəli sürdüyü namizədlər seçicilərin yüksək etimadını qazanacaq və növbəti mərhələdə AKP-ni təmsil edən nümayəndələr Azərbaycanın müxtəlif bölgələrində fəaliyyət göstərən bələdiyyələrin işində yaxından iştirak edəcəklər.

Realtv.az