“Danışıqlar prosesində dialoq olduqca vacibdir”.

ATƏT-in Minsk Qrupunun amerikalı həmsədri Ceyms Uorlik Azərbaycan və Ermənistan xarici işlər nazirlərinin görüşünün baş tutmamasından təəssüflənib.

Azerinfo.az-ın məlumatına görə, bu barədə Uorlik Twitter səhifəsində yazıb.

“Biz təəssüf edirik ki, Azərbaycan və Ermənistan xarici işlər nazirləri ATƏT-in Xarici İşlər Nazirləri Şurasının toplantısı çərçivəsində görüşə bilmədilər. Dialoq Dağlıq Qarabağ münaqişəsinin sülh yolu ilə həll olunması prosesində olduqca vacibdir”, - deyə, Uorlik qeyd edib.

Qeyd edək ki, 4-5 dekabr tarixlərində İsveçrənin Bazel şəhərində keçirilən ATƏT-in 21-ci nazirlər şurasının iclasından öncə Ceyms Uorlik xarici işlər nazirləri Elmar Məmmədyarov və Edvard Nalbandyanın tədbir çərçivəsində görüşəcəyini bildirmişdi.

Lakin iclas çərçivəsində xarici işlər nazirləri ATƏT-in Minsk Qrupu həmsədrləri ilə ayrı-ayrılıqda görüşüblər.