"Bütün nazirlər bilməlidirlər ki, onların yığdıqları gec-tez əlindən alınacaq" - Xəbərdarlıq

Vergilər naziri Fazil Məmmədovun adı son günlər "milyonluq qalmaqallar"da hallanır. Sosial şəbəkələrdə bununla bağlı yayılan məlumatlar istifadəçilər tərəfindən müzakirə və tənqidlərə səbəb olur.
"Yeniavaz.com" saytı bu mövzularla bağlı Müasir Müsavat Partiyasının sədri Hafiz Hacıyevdən açıqlama alıb. "Mən Fazil Məmmədov hələ işdən çıxarılmamışdan öncə onu sərt tənqid eləmişəm. İndi isə Fazil Məmmədovu siyasi meyit adlandırmaq olar. Saytlar yazırlar ki, Fatma Abdullazadə Fazil Məmmədovdan 1 milyon pul alıb və qaytarmır. Bilirsiniz, 1 milyon Fazil Məmmədov üçün qəpik-quruşdur. Fazil Məmmədovun altından bəlkə 400 milyard da çıxar, nəinki 1 milyon. Ümumiyyətlə, Azərbaycanda hansı naziri tərpətsən, altından milyardlar çıxar. Fazil Məmmədovun naziri işlədiyi tarixi və aldığı maaşı hesablamaq lazımdır. Əlində olanlardan aldığı maaş dəyərində pulu saxlayıb, qalanını almaq lazımdır. Soruşmaq lazımdır ki, bu qədər var-dövləti, pulu necə yığıb, hardan alıb? Fazil Məmmədov uzun illər Azərbaycanda sahibkarlara zərbə vurmaqla məşğul olub, onların inkişafının qarşısını alıb. Fazil Məmmədovun yaratdığı maneələr olmasaydı, sahibkarlar Azərbaycan iqtisadiyyatına daha böyük töhfə verə bilərdilər.

Mən düşünürəm ki, bu elədiklərinə görə, Fazil Məmmədovun yığdığı bütün var-dövlət əlindən alınmalı, özü isə həbsə atılmalıdır. Yığmısan, elə bilərik dövlət bu vəsaiti banka qoymuşdu, indi də geri alır. Həmin pullar Fazil Məmmədovdan alınmalı və dövlət büdcəsinə qaytarılmalıdır. Ziya Məmmədov necə oldu? Onun da bu illər ərzində yığdığı milyardlar əlindən alınır. Görün, nə qədər yığıbmışsa, əlindən alırlar-alırlar qurtarmır. Eyni proses Fazil Məmmədovla bağlı başladılmalıdır. Bütün nazirlər bilməlidirlər ki, onların yığdıqları gec-tez əlindən alınacaq. Ziya Məmmədov, sabiq milli təhlükəsizlik naziri Eldar Mahmudovun yığdıqları buna misal ola bilər.

Fazil Məmmədovun dünyanın bir çox ölkələrində mülkləri var. Bundan əlavə, onun Ukraynada, Gürcüstanda, Türkiyədə biznes şəbəkələri var. Bu şəbəkələr hamısı üzə çıxarılmalıdır. Saytlar yazır ki, onun qızı fotosunu paylaşıb və altından "ən dürüst adam, adam kimi adam" yazıb. Mən onların ailə məsələlərinə qarışmaq istəmirəm. Qızıdır, atasını elə təsəvvür edir. Ancaq reallıq var, qanunauyğunluq var. Mənim yazdıqlarımın hamısı sonradan hamısı öz təsdiqini tapıb. Mən Ziya Məmmədovla bağlı da açıqlama vermişdim, o hələ vəzifədə olarkən bildirmişdim ki, onun yığdıqları əlindən alınmalıdır. Eyni tənqidləri Fazil Məmmədov hələ vəzifədə olarkən demişdim. Mən xoşlamıram kimsə işdən çıxarılandan sonra başlayım onu haqqında açıqlama verməyə. Fazil Məmmədovla bağlı da mənim sərt çıxışlarım o vəzifədə olarkən olub və dediklərimin hamısı təsdiqini tapıb. Jurnalistlər mənim dostlarımdılar, mən onlara həmişə dost münasibətindəyəm və verdikləri sualları da çalışıram ki, həmişə cavablandırım. Amma onlar nədənsə, heç vaxt yazmırlar ki, Hafiz Hacıyevin dedikləri hamısı düz olur. Mən nə deyirəmsə, həmişə təsdiqini tapır. Biz nəinki Fazil Məmmədov və digərləri ilə bağlı, hazırda vəzifədə olan nazirlərlə bağlı da araşdırma aparırıq və topladığımız faktları mənim qardaşıma - Prezidentə göndərəcəyik".

Hafiz Hacıyev bu işlərlə bağlı rəhbəri olduğu partiyanın tərkibində yeni ictimai palata yaradıldığını da deyib: "Həmin palataya uzun illər hüquq-mühafizə orqanlarında çalışmış bir şəxs rəhbərlik edəcək. Biz bu palata vasitəsi ilə nazirlərin, icra hakimiyyəti başçılarının yığdıqları var-dövlətləri, mülkləri üzə çıxaracağıq. Mənim qardaşım həmişə deyir ki, icimai nəzarət olmalıdır. Azərbaycan dövləti inkişaf edir və biz ictimai nəzarətlə bu inkişafa öz dəstəyimizi verəcəyik. Hansı məmurun nə qədər mülkləri varsa, üzə çıxaracağıq. Məsələn, paytaxtın Həsən Əliyev küçəsində çoxlu sayda villalar var. Araşdıracağıq görək bu küçədəki villaların hansı icra başçılarına, məmurlara məxsusdur? Yaxud gedəcəyik Bodruma oradakı mülkləri, villaları araşdıracağıq. Topladığımız məlumatların isə hamısını dövlət başçısına göndərəcəyik".