Milli Məclisin Aqrar Siyasət Komitəsinin sədri, Yeni Azərbaycan Partiyasının (YAP) İdarə Heyətinin üzvü Eldar İbrahimov ssenari müəllifi Milli Şuranın fəxri sədri Rüstəm İbrahimbəyov olan “Qafqaz triosu” adlı filmlə bağlı kəskin etirazını bildirib.
E.İbrahimov “Ölkə.Az”a açıqlamasında Rüstəm İbrahimovu “erməni” adlandırıb:

“Əgər onun damarında azərbaycanlı qanı axsaydı, Rüstəm İbrahimbəyov belə bir rüsvayçılığın altına girməzdi. O, ermənidən də pisdir. Heç erməni belə, azərbaycanlıları bu cür təhqir etməyi bacarmır. Heç erməni elə film yarada bilməz. Təbii ki, Rüstəm İbrahimbəyov bu filmi ermənilərin sifarişi ilə çəkir. O, satqın və Azərbaycan xalqına açıq düşmən olan adamdır”.

Komitə sədri qeyd edib ki, Rüstəm İbrahimbəyovun Azərbaycan xalqına qarşı xəyanəti birinci dəfə deyil:

“Bir neçə il əvvəl Rüstəm İbrahimbəyov “Milyarderlər İttifaqı” adlanan qrupda yer almışdı, məkrli planlar yürüdürdü. Görünür ki, xəyanət etmək bu adamın qanında var. Ümumiyyətlə, bunun bədənindən azərbaycanlı qanı axmır”.

Deputat Azərbaycanda Rüstəm İbrahimbəyovu müdafiə edən ziyalılara da çağırış edib:
“Çox təəssüf ki, Rüstəm İbrahimbəyov kimi adamları Azərbaycan daxilində də müdafiə edirlər. Axı Azərbaycana Rüstəm İbrahimbəyovun çəkdiyi bu filmdən alçaq, xəyanətkar hansı hərəkət ola bilər? Bu adam Azərbaycana əli azərbaycanlı körpələrin və anaların qanına batan, qardaş-bacılarımızı qətlə yetirən və əsirlikdə saxlayan, uşaqların başını kəsən erməni qatillərindən daha betər zərbə vurur. Bu da açıq şəkildə sübut edir ki, Rüstəm İbrahimbəyov ermənilərə qulluq edir. Bu cür hərəkətlərin başqa adı yoxdur”.

E.İbrahimov müvafiq qurumları Rüstəm İbrahimbəyovun Azərbaycan pasportundan və azərbaycanlı adından məhrum etməyə çağırıb:

“Belə adamlara Azərbaycanda əsla yer olmamalıdır. Əgər Rüstəm İbrahimbəyov hələ də Azərbaycan pasportu daşıyırsa, o pasport əlindən alınmalıdır. Ümumiyyətlə, onun adını Azərbaycandan silmək lazımdır. Çünki Azərbaycan xalqına bu qədər açıq xəyanət edən olmamışdı. Rüstəm İbrahimbəyov dünyada azərbaycanlıları aşağılayıb. Hesab edirəm ki, hər bir azərbaycanlı bu hərəkətlərinə görə Rüstəm İbrahimbəyova nifrət edir”.

Komitə sədri qeyd edib ki, Azərbaycanın radikal müxalifətinin hələ də Rüstəm İbrahimbəyovun əməlləri ilə bağlı susqunluq nümayiş etdirməsi onun ermənipərəst mövqeyinə açıq dəstək vermək kimi qiymətləndirilir:

“Çox təəssüf ki, bir neçə il öncə “Milli Şura” adlanan qurumun üzvləri həmin Rüstəm İbrahimbəyovu özlərinə lider seçmişdilər. Yəqin ki, Milli Şura Rüstəm İbrahimbəyovu ona görə lider seçmişdi ki, digər torpaqları da ermənilərə verə bilsinlər. Bunların hamısı ermənilərə qulluq edən adamlardır. Rüstəm İbrahimbəyov və onun yanında olan tayları ermənilərə xidmət edirlər. Bu cür ermənipərəst hərəkətlərinə görə Rüstəm İbrahimbəyovu ən pis söyüşlərlə söysək belə bu ona az edər. Ancaq tərbiyəm ona yol vermir ki, Rüstəm İbrahimbəyovu təhqir edim. Bu adam ən çirkin söyüşlərə layiqdir”.