Şərurlu İsfəndiyar kimi tanınan iş adamı İsfəndiyar Axundov artıq 5 ildir ki, ona məxsus “Şərur” MTK-dan mənzil alan sakinləri süründürür, mənzillərini özəlləşdirməyə imkan vermir.

Bu şikayətlə virtualaz.org-un redaksiyasına Yasamal rayonu, M. Xiyabani küçəsi 194, 196, 198 və 200 ünvanlarında yaşayan sakinlər müraciət ediblər.

Şikayətçilər bildirirlər ki, hazırda yaşadıqları M. Xiyabani küçəsində hələ 2008-ci ildən başlayaraq “Mur-Ay” MMC tərəfindən heç bir sənədləşdirmə aparılmadan tikinti aparılıb və binalardan mənzil alan sakinlər dələduzluq yolu ilə aldadılıb. Yalnız 2011-ci ildə prezidentin məsələyə müdaxiləsindən sonra vətəndaşlara dəymiş ziyanın ödənməsi üçün tədbirlər görülüb, binanın tikintisinin davam etdirilməsi “Şərur” MTK-ya tapşırılıb.

17 dövlət qurumu (Bakı Şəhər İcra Hakimiyyəti, Baş Prokurorluq, Daxili İşlər Nazirliyi, Fövqəladə Hallar nazirliyi və sair) ilə “Şərur” MTK arasında olan razılaşma müqaviləsinə görə, MTK-ya yarımçıq qalmış binaların tamamlanması üçün əlverişli şərait yaradıb, güzəştlər verib. Əslində göstərilən ünvanlarda yerləşən 1 və 3 girişli binaların tikintisi çoxdan başa çatsa da, MTK rəhbərliyi – İsfəndiyar və İmran Axundov qardaşları “Mur-Ay” MMC-nin fırıldaqlarından zərər çəkən sakinlərlə bağlı götürdükləri öhdəliyi yerinə yetirməkdən imtina edirlər.

Sakinlərin sözlərinə görə, “Şərur” MTK ilə müvafiq dövlət qurumları arasında bağlanan müqavilənin 11 və 30-cu maddələrinə görə, ərazidə tikintinin başa çatdırılmasından sonra MTK binaların istismara qəbul edilməsi üçün Bakı Şəhər İcra Hakimiyyətinə və digər aidiyyati orqanlara müraciət etməli idi. Yalnız bu prosedurdan sonra vətəndaşlar öz mənzillərini “ASAN xidmət” vasitəsilə özəlləşdirə bilərdilər. Amma İsfəndiyar Axundov bunu etməkdən imtina edir.

“O, açıq-aşkar şəkildə sakinlərə bildirir ki, sənədlər hazırdır, amma lazımi orqanlara göndərməyəcək. Bəhanə olaraq Vergilər Nazirliyinin zərərçəkmiş vətəndaşlara veriləcək mənzillərin satışından əldə olunan gəlirlərin vergiyə cəlb olunmaması haqqında öhdəliyini yerinə yetirməməsini göstərir. İsfəndiyar və İmran Axundovlar özəlləşməyən hər mənzilin alqı-satqısı üçün sakinlərdən qanunsuz olaraq 3000-4000 AZN pul tələb edir. Görünür ki, mənzillərin özəlləşdirilməsi onlara sərf etmir. Dövlətin dəstəyi ilə tamamladıqları binalarımızı öz mülkləri kimi idarə edir, “burda mənəm, Bağdadda kor xəlifə” prinsipi ilə hərəkət edirlər”, - deyə sakinlər bildirirlər.

Sakinlərin şikayətində o da qeyd olunur ki, bu illər ərzində hər ay onlardan binaların təmir və abadlıq işləri adıyla külli miqdarda pullar yığılsa da, abadlaşdırılmaya bir qəpik də də olsun ayrılmayıb. Digər tərəfdən, binalarda çalışan işçilərin əmək müqavaləsinin olması da sual altındadır. Sakinlər deyirlər ki, binanın qaz, elektrik enerjisi və telefon rabitə ilə təmin olunmasında sakinlər özləri çox zəhmət çəkiblər: “Əgər hər işi özümüz görəcəkdiksə, “Şərur” MTK kimə lazımdır?”, - deyə sakinlər bildirirlər.

Sadalanan ünvanlarda yaşayan 150-yə yaxın sakin bu problemlə bağlı prezident İlham Əliyevə, vitse-prezident Mehriban Əliyevaya məktub ünvanlanıb. Onlar prezidentdən İsfəndiyar və İmran Axundov qardaşlarının özbaşnalıqlarına son qoyulmasını, onlara öz əmlaklarını özəlləşdirməyə şərait yaradılmasını xahiş edirlər.

Sakinlərin şikayətinə aydınlıq gətirmək üçün qarşı tərəfə zəng etdik. Lakin “Şərur” MTK-nın rəhbəri İsfəndiyar Axundov sualımızı dinlədikdən sonra telefonu söndürdü. Dəfələrlə zəng etməyimizə baxmayaraq, heç bir cavab ala bilmədik.

Xatırladaq ki, “ Şərur” MTK-nın maliyyə fırıldaqları ilə bağlı Xiyabani küçəsində yaşayan sakinlər dəfələrlə aidiyyati qurumlara şikayət edirblər. MTK-nın öz öhdəliklərini yerinə yetirməməsi ilə bağlı edilən şikayətlər mətbuatda işıqlandırılsa da, bu şəxslərin qanunsuz əməllərinə qarşı heç bir tədbir görülməyib.