“Qida Təhlükəsizliyi Agentliyi tərəfindən müəyyən edilən cərimə və rüsumların 50 faizinin müvafiq icra hakimiyyətinin hesabına köçürülməsi doğru hal deyil”.
Bu sözləri millət vəkili Qüdrət Həsənquliyev “Dövlət rüsumu haqqında” qanun layihəsinin müzakirəsi zamanı çıxışında deyib.
Millət vəkili bildirib ki, bununla cəmiyyətdə sosial ədalət prinsipi pozulur:

“Dövlət Gömrük Komitəsi, Yol Polisi ilə bağlı da əvvəllər bu cür qanun layihələri təsdiq edilib. Lakin bu doğru yanaşma deyil. Hesab edirəm ki, dövlətin əmək haqqı siyasəti olmalıdır. Dünyada bu hazır meyarlar əsasında müəyyən edilir. Məsələn, yüksək ixtisaslı intellect tələb edən əmək fəaliyyəti, həyat və fəaliyyət üçün risklər yaradan və digər hallarda yüksək əmək haqqı nəzərdə tutulur. Qida Təhülkəsizliyi Agentliyi və ya Dövlət Gömrük Komitəsinin əməkdaşı rüsum toplaya bilir, lakin Milli Məclisin əməkdaşı rüsum toplaya bilmir.
Bəzən əmək haqqı qədər, bəzən ondan çox miqdarda maaş alırlar. Bu nə qədər ədalətlidir? Daha çox cərimə yazsınlar deyə biz onları stimullaşdırırıq. Məsələn, yol polisi ən xırda cəzaya görə sürücüyə cərimə yazır çünki 25 faizi ona veriləcək. Dövlət öz məmurlarını bu formada işləməyə

stimullaşdırmamalıdır. Onların çəkdiyi zəhmətə görə əmək haqqı ödənilməlidir. Rüsumlar büdcəyə toplanmalıdır, əməkdaşın fəaliyyətinə görə maaş verilməlidir. Bunu etməklə digər dövlət qulluqçularına münasibətdə ciddi şəkildə ədalətsizliyə yol vermiş oluruq”.