Belarus Xarici İşlər Nazirliyi Ermənistanın baş naziri əvəzi Nikol Paşinyanın Belarus prezidenti Aleksandr Lukaşenkonun ünvanına səsləndirdiyi bəyanatlara cavab verib.

BELTA agentlyiinə istinadən xəbər verir ki, idarənin mətbuat katibi rəsmi nümayəndəsi Anatoli Qlaz Paşinyanın bəyanatlarını qəbuledilməz adlandırıb.

“Yəqin, cənab Paşinyan hələ başa düşməyib ki, “küçə demokratiyası”nın qaydaları böyük siyasətdə qəbuledilməzdir. Təəssüf edirik. Ümid edirik ki, bu, zamanla qaydaya düşəcək", - Anatoli Qlaz deyib.

Belarus XİN-in nümayəndəsi əlavə edib ki, görünür, Paşinyan özünü cəzalandırmaq və ya əfv etmək səlahiyyəti olan beynəlxalq prokuror kimi təsəvvür edir.

“Amma dövlətlərarası münasibətlərdə protokolun və etiketin tamamilə dəqiq normaları mövcuddur”, - Anatoli Qlaz vurğulayıb.

Xatırladaq ki, daha əvvəl Nikol Paşinyan Kollektiv Təhlükəsizlik Müqaviləsi Təşkilatı (KTMT) ətrafında yaranan vəziyyətin bu təşkilatın üzvü olmayan ölkə - Azərbaycanla müzakirəsinə görə Belarus prezidenti Aleksandr Lukaşenko və Qazaxıstan prezidenti Nursultan Nazarbayevdən izahat tələb edəcəyini bildirib.