Moskvada Rusiya Azərbaycanlılarının I Forumu üzrə son hazırlıqlar başlayıb. Dünya Azərbaycanlıları Mədəniyyət Fondunun prezidenti Fizuli Məmmədov toplantının baş tutacağı Prezident Oteldə “Yeni Müsavat” Media Qrupunun sahibi Rauf Arifoğlu və heyətinə Forum haqqında ilk açıqlamalarını verib.

Dünya Azərbaycanlıları Mədəniyyət Fondunun təşkilatçılığı il keçiriləcək Forum Rusiya azərbaycanlılarının paytaxt Moskva və Moskva vilayətində fəaliyyət gəstərən qurumlarının son illərdə bir araya gələcəyi ilk tədbir olacaq. Fizuli Məmmədov bildirib ki, əsas məqsəd Rusiyada diaspor məsələsindəki boşluğu aradan qaldırmaq, uzun illər bu ölkədə fəaliyyət göstərən azərbaycanlıların sağlam müzakirələr apara, ortaq qərarlar qəbul edəcəyi birlik modelini yaratmaqdır.








Fizulu Məmmədov bildirib ki, aprelin 27-də başlayacaq forum bir gün davam edəcək. Müzakirələrdən sonra qurultayın keçirilməsi üzürə təşkilat komitəsi yaradılacaq:”Foruma Rusiyanın elmi elitasına daxil olan alimlər, hüquqşünaslar, iş dünyasının təmsilçiləri, uğurlu diaspor fəaliyyəti təcrübəsi olan soydaşlarımız dəvət olunub. Ümid edirəm, biz ən qısa zamanda birmənalı olaraq Rusiyadakı azərbaycanlıların maraqlarını qoruyacaq nüfuzlu bir qurum yarada biləcəyik”.

Musavat.com xəbər verir ki, Ümumrusiya Azərbaycanlıları Konqresi ləğv edildikdən sonra Rusiyadakı azərbaycanlıları bir çətir altında birləşdirəcək qurum yoxdur. Fəaliyyətdə olan qurumlar arasında isə ən müxtəlif məsələlərlə bağlı fikir ayrılıqları var. Fizuli Məmmədov bildirib ki, yeni birliyi bu müzakirələrin azərbaycanlılar üçün müsbət təşəbbüslərə dönəcəyi platforma kimi görür:”Hüquq müstəvisində bütün işlər Rusiya qanunvericiliyinə tam uyğun şəkildə nizamlanıb. Bu məqsədlə biz Rusiya Federasiyasının ən ünlü vəkilləri ilə işbirliyi qurmuşuq. Ümumrusiya Azərbaycanlıları Konqresi Rusiya qanunvericiliyinə uyğun olmaması səbəbindən məhkəmə qərarı ilə ləğv edilib. Biz bu təcrübəni xüsusilə nəzərə alaraq qərarlarımızı Rusiya Federasiyasının milli azlıqlar, onların ölkə içərisində fəaliyyətini tənzimləyən, eləcə də ictimai qurumların yaradılması ilə bağlı bütün qanunvericiliyi detallı incələdikdən sonra qəbul etmişik. Fikrimcə, biz həyatını Moskva və Moskva vilayətinin elm, biznes, mədəniyyət dünyasına həsr edən soydaşlarımızı bir araya gətirə, arzu etdiyimiz diaspor təşkilatı yarada biləcəyik”.

Aygün Muradxanlı, Musavat.com
Moskva