Baş Nazir Novruz Məmmədov iki yeni qərar imzalayıb.
Azərbaycanda fövqəladə vəziyyət şəraitində əhalini ərzaq məhsulları ilə təmin edəcək qurum müəyyənləşib.

Bu Baş Nazir Novruz Məmmədovun “Aqrar tədarük və təchizat” Açıq Səhmdar Cəmiyyətinin (ASC) Nizamnaməsinin təsdiq edilməsi barədə imzaladığı qərarda öz əksini tapıb.

Qərara əsasən, ASC dövlət müəssisə və təşkilatları (idarələri) tərəfindən kənd təsərrüfatı və ərzaq məhsullarının (dövlət taxıl fondu üçün alınan buğda istisna olmaqla) mərkəzləşdirilmiş qaydada dövlət büdcəsinin vəsaitləri hesabına satın alınmasını təşkil edəcək.

Eyni zamanda büdcə təşkilatlarının verdiyi sifarişlər üzrə “Aqrar tədarük və təchizat” ASC-nin elektron portalında göstərilən məhsul istehsalçılarından (satıcılarından) məhsulların birbaşa satın alınmasını, kommersiya fəaliyyəti ilə məşğul olan hüquqi və fiziki şəxslərin verdiyi sifarişlər üzrə kənd təsərrüfatı və ərzaq məhsullarının məhsul istehsalçılarından birbaşa satın alınmasını və təchizatını həyata keçirəcək.

“Aqrar tədarük və təchizat” ASC yerli kənd təsərrüfatı və ərzaq məhsullarının istehsalını və ixracını artırmaq məqsədilə kənd təsərrüfatı və ərzaq məhsullarının xarici ölkələrə ixracını, habelə yerli bazarda satışının təşkili və həyata keçirilməsini təmin edəcək, o cümlədən bütün növ satış obyektlərini təşkil və idarə edəcək.

Bundan əlavə ASC ölkədə istehsal olunan kənd təsərrüfatı və ərzaq məhsullarının satışı və ixrac edilməsi üzrə vasitəçilik, kənd təsərrüfatı və ərzaq məhsullarının istehsalı, emalı, təchizatı, ixracı üzrə maarifləndirmə, informasiya və məsləhət xidmətləri göstərəcək.

Həmnçinin fövqəladə vəziyyət şəraitində əhalinin ərzaq məhsullarının təmin edilməsi ilə bağlı tapşırıqları icra edəcək.
Qərarda qeyd olunub ki, cəmiyyət bu Nizamnamə ilə müəyyən edilmiş məqsədlər üçün lisenziya və ya icazə tələb olunan fəaliyyət növü ilə yalnız belə lisenziya və ya icazə aldıqdan sonra məşğul ola bilər.

Novruz Məmmədovun digər imzaladığı qərarı ilə “Aqrar tədarük və təchizat” Açıq Səhmdar Cəmiyyətinin (ASC) İdarə Heyətinin tərkibi müəyyənləşib.

Bu Baş Nazirin “Aqrar tədarük və təchizat” ASC-nin Nizamnaməsinin təsdiq edilməsi barədə imzaladığı qərarda öz əksini tapıb.

Qərara əsasən, cəmiyyətin İdarə Heyəti (bundan sonra – İdarə Heyəti) cəmiyyətə ümumi rəhbərliyi və nəzarəti həyata keçirəcək.

İdarə Heyəti 3 (üç) üzvdən ibarətdir. İdarə Heyətinin sədrini və digər üzvlərini Kənd Təsərrüfatı naziri vəzifəyə təyin və vəzifədən azad edəcək.

Eyni zamanda İdarə Heyətinin sədri müvəqqəti olmadıqda, onun səlahiyyətlərini İdarə Heyəti üzvləri arasından sədrin müəyyən etdiyi şəxs icra edəcək.

Qərarla İdarə Heyətinə cəmiyyətin illik hesabatlarını və maliyyə hesabatlarını təhlil edərək təsdiq edilməsi, mənfəətinin və zərərinin bölüşdürülməsi üçün Nazirliyə təkliflər vermək, cəmiyyətin strateji məqsəd və planlarını, habelə inkişaf istiqamətlərini müəyyən etmək, strateji məqsəd və planlarının, habelə büdcəsinin icrasına, cəmiyyətin fəaliyyətinə nəzarət etmək, cəmiyyətin strukturu, əməkhaqqı fondu və işçilərin say həddi ilə bağlı nazirliyə təkliflər vermək, nazirliyin razılığı ilə cəmiyyətin törəmə cəmiyyətlərinin yaradılması, yenidən təşkili və ləğvi, həmçinin idarə, filial və nümayəndəliklərinin yaradılması və ya ləğvi barədə qərar qəbul etmək və s tapşırılıb.