27-10-2020, 19:41 Oxunub: 84

Azərbaycana və Türkiyəyə təzyiqlərin pərdəarxası - “Nəticəyə təsir etməyəcək”

Azərbaycana və Türkiyəyə təzyiqlərin pərdəarxası - “Nəticəyə təsir etməyəcək”


Azərbaycan Ordusu Qarabağ savaşının taleyini artıq həll etdiyi bir mərhələdə, həm dövlətimizə, həm də qardaş Türkiyəyə qarşı ABŞ-ın və Qərbin təzyiqləri artmaqdadır. Türkiyə prezidenti Ərdoğan da bugünlərdə ABŞ-a və Fransaya ciddi mesajlar verib, bütün təzyiq və sanksiya hədələrinə baxmayaraq Azərbaycanın yanında olduğunu bildirib. Malatyada AKP-nin toplantısında çıxış edən Türkiyə prezidenti Rəcəb Tayyib Ərdoğan deyib ki, "Qafqazda azərbaycanlı qardaşlarımızın yanında olduğumuz üçün suçlandıq".

O, çıxışında ABŞ-a çox açıq mesajlar verib: “İndi eşidirəm ki, bəzi amerikalılar çıxıb İlham qardaşıma zəng edib deyir ki, biz sizin yanınızda kimin olduğunu bilirik, Ərdoğan var, Türkiyə var. Və? Biz Türkiyəyə də, yeri gələrsə, sanksiya tətbiq edəcəyik. Siz daha kiminlə rəqs etdiyinizi bilmirsiniz! Sanksiyan nədirsə, gec qalma, tətbiq et!...”

Ərdoğan daha sonra Rusiyadan alınan S-400-lərə toxunub. Deyib ki, ABŞ bu raket kompleksinin Rusiyaya geri qaytarılmasını istəyib: “Biz qəbilə dövləti deyilk. Biz Türkiyəyik, Türkiyə. Biz ABŞ-dan pulumuzu verib F-35 almaq istədik. Vermədilər. PUA almaq istədik, yenə verilmədi. İndi biz PUA da, SİHA da istehsal edirik. Biz haqlı yolumuza qürurla davam edəcəyik. Dünyadakı bütün məzlumların səsi olacağıq...”

Ərdoğan çıxışında Fransa prezidenti Makronu da sərt şəkildə tənqid edib: “Bu dəqiqə Fransanın başındaki zat çaşmış halda yatıb-durub Ərdoğanla əlləşir. Sən öncə bir özünə bax. Bu, bir xəstəlikdir. Həqiqətən kontroldan keçməsi lazımdır”.

Qeyd edək ki, oktyabrın 26-da Prezident İlham Əliyev də xalqa müraciətində Azərbaycana olan təzyiqlərdən danışıb.

Dövlət başçısı deyib ki, bir ay ərzində demək olar ki, hər gün müsahibə verir: “Hər dəfə soruşurlar ki, Türkiyə ”F-16?ları burada nə gəzir? Bu suala cavab verməkdən yorulmuşam. Peykiniz var, gedin baxın. F-16-lar təlimə gəlib və yerdədir. Əgər bizə qarşı kənardan təzyiq olarsa, onda F-16-ları görəcəksiz".

Qeyd edək ki, dövlət başçısı İlham Əliyev də bütün mövcud təzyiqlərə baxmayaraq Azərbaycanın öz ərazi bütövlüyünü təmin edərək, regionda sülhü bərpa edəcəyini bildirib.

Məsələni “Yeni Müsavat” üçün şərh verən Elxan Şahinoğlu bildirib ki, dünyanın böyük dövlətləri birbaşa Azərbaycana və Türkiyəyə təzyiqlər edirlər: “Bizə Rusiyadan da, Fransadan da, ABŞ-dan da təzyiq var. Bu təzyiqləri həm təkbaşına, həm də Türkiyənin dəstəyi sayəsində neytrallaşdırırıq. Ərdoğan Rusiya prezidenti ilə telefonla danışıb, İran prezidenti ilə də telefonla danışıb. Dünənki çıxışı da Amerikaya mesaj idi ki, bu təzyiqlər bizim üçün nəticə verməyəcək, biz Azərbaycana dəstəyimizi davam etdirəcəyik və Azərbaycan istədiyi nəticəni əldə edəcək. Dövlət başçısı İlham Əliyev də xalqa müraciətində dedi ki, təzyiq var . Bu təzyiqləri Azərbaycan heçə sayır və öz işini davam etdirir. Müharibənin ilk 4-5 günündə bizdə müəyyən qədər suallar var idi ki, bu təzyiqlər bizə təsir edə bilərmi? Amma indi çox rahatıq, çünki artıq bu təzyiqlər bizə təsir etmir. Bizə qarşı nə edəcəklər, əl-qolumuzu bağlayacaqlar, yoxsa sanksiyalar tətbiq edəcəklər? Azərbaycan ərazisində savaş gedir və biz öz ərazi bütövlüyümüzü təmin edirik”.

Politoloqun fikrincə, Ərdoğanın hər dəfə bu mövzuya toxunması vacibdir: “Bu, dünyaya mesajdır, Azərbaycana da mesajdır. Azərbaycan da bilsin ki, Türkiyə daim bu təzyiqləri neytrallaşdıracaq. Ona görə də mən bu təzyiqlərin Azərbaycanın planlarına təsir edəcəyini düşünmürəm. Doğrudur, Moskvada görüş oldu, Vaşinqtonda görüş oldu, atəşkəslə bağlı şifahi razılaşma var. Ancaq bu atəşkəslər Ermənistan tərəfindən pozulduğuna görə Azərbaycan öz işini rahat davam etdirə bilər. Türkiyə ilə Azərbaycanın ortaya qoyduğu bir mesaj var ki, atəşkəsdən sonra nə olacaq, işğalçı dövlətin qoşunu torpaqlarımızı tərk edəcəkmi? Bu suala heç kim cavab vermirsə, Azərbaycanla Türkiyə öz işini davam etdirəcək”.

ABŞ-ın Türkiyəyə silah satmamasının, onun Cənub Qafqazdakı roluna qısqanclıqla yanaşmasının səbəblərinə gəlincə, politoloq vurğuladı ki, Türkiyə regionun ən böyük dövlətlərindən birinə çevrilir: “Türkiyə güclənir. Türiyə ilə Rusiyanın dostluğu da Amerikanı narahat edir. Necə ki, Türkiyənin S-400 raketlərini alması Amerikanı narahat etdi. Amerika və Türkiyə əvvəl müttəfiq idilər, indi isə artıq rəqiblərə çevrilirlər. Türkiyənin bölgədəki rolunu nə Amerika, nə Fransa, nə də ki Qərbin digər dövlətləri qəbul edə bilmir. Bu səbəbdən sanksiyalar və təzyiqlər yolu ilə Türkiyəni zəiflətməyə çalışırlar. Ancaq heç biri alınmır, Türkiyə öz bildiyi yolla gedir. Türkiyənin rolu Azərbaycanla strateji müttəfiqliyə görə də artacaq, eynilə Azərbaycanın da gücü və rolu Türkiyə ilə strateji müttəfiqliyə görə artacaq. Bu da Qərbdə və Rusiyada bir çoxlarını narahat edir. Ancaq bu narahatlığa baxmayaraq heç bir təzyiq və təsir bizim planlara mane ola bilmir”.

Avropanın Dağlıq Qarabağ münaqişəsinə hər zaman olduğu kimi, bu gün də ikili standartlarla yanaşmasına toxunan E.Şahinoğlu bildirdi ki, biz bu məsələni bitirdikdən sonra hər kəs Azərbaycanın qələbəsi ilə razılaşacaq: “İndi bizə təzyiq etsələr də, Azərbaycan qələbə çalandan sonra, Ermənistanı sülhə məcbur edəndən sonra da biz bizə qarşı ikili standartlarla çıxış edənləri unutmayacağıq. Onların hamısı Azərbaycanla tərəfdaşlıq münasibətlərini qorusunlar, təmin etsinlər. İsrail dövləti Azərbaycanla sıx əlaqələrə malikdir, Azərbaycan ona neft satır, silah alır. Onlar Azərbaycanın haqlı mövqeyini dəstəkləyirlər. Belə dövlətlərin sayı çoxdur. Türkiyə strateji müttəfiqimizdir, Pakistan və Əfqanıstan var. Digər dövlətlər Amerika, Fransa və digərləri Ermənistanı qorumağa, status-kvonu saxlamağa çalışırlar. Rusiyada da belə qüvvələr var. Ancaq Azərbaycan qələbəni təmin edəndən sonra Azərbaycanla hesablaşmağa, tərəfdaşlıq münasibətləri saxlamağa çalışacaqlar. Bilirlər ki, Cənubi Qafqazın əsas açar dövlətlərindən biri Azərbaycandır”.
“Yeni Müsavat”
ABŞ S-400-ə görə Türkiyəyə qarşı birtərəfli sanksiya tətbiq edə bilər ABŞ S-400-ə görə Türkiyəyə qarşı birtərəfli sanksiya tətbiq edə bilər Siyaset ABŞ Türkiyəyə 30 yeni sanksiya tətbiq edəcək - ŞOK ABŞ Türkiyəyə 30 yeni sanksiya tətbiq edəcək - ŞOK Siyaset "ABŞ təzyiqlə Türkiyəni diz çökdürə bilməyəcək" — Ərdoğan Dunya Türkiyə prezidenti Rəcəb Tayyib Ərdoğandan Dünyanı Şoka salan açıqlama - Bax bu çoxdan olmalıydı Türkiyə prezidenti Rəcəb Tayyib Ərdoğandan Dünyanı Şoka salan açıqlama - Bax bu çoxdan olmalıydı Dunya ABŞ-ı sərt tənqid edən Ərdoğan — “Fransaya səfər edəcəyəm” ABŞ-ı sərt tənqid edən Ərdoğan — “Fransaya səfər edəcəyəm” Dunya