Şəhərin meri bütün pullu işləri Akif Zeynalova verib

Sumqayıtın yeni icra başçısı Zakir Fərəcovun adı hər gün yeni bir qalmaqalda hallanır. Redaksiyamız xəbər verir ki, bir müddət əvvəl ölkənin ən iri üçüncü şəhərinə icra başçısı təyin olunan sözügedən şəxsin yeni məziyyəti üzə çıxıb.

Məlumatlara görə, hazırda Sumqayıt şəhərində bütün gəlirli işlər, habelə tender və digər məsələlər hamısı icra başçısının qudasına həvalə edilib. Zakir Fərəcov tərəfindən atılmış bu addımdan sonra şəhərdə durum daha da ağırlaşmağa başlayıb. Çünk icra başçısının qudası Akif Zeynalov birmənalı olaraq, sahibkarından tutmuş, dövlət müəssisələrinin rəhbərlərinə qədər hamısı üçün bəlli bir məbləğ müəyyənləşdirib. Həmin pulları toplamaq, sərf etmək, təyinatı üzrə xərcləyib, xərcləməmək isə artıq qudanın işidir.

Son məlumata görə, bu yaxınlarda dövlət başçısı tərəfindən ayrılmış 16 milyon manatın da aqibətinə Akif Zeynalov aydınlıq gətirəcək. Belə ki, Fərəcovun qudası həmin pulun hara, nə qədər xərclənəcəyi, hansı dükandan nələrin alınacağı, xaricdən nələr gətiriləcəyinin artıq tədbirini töküb.

Yazıda adları çəkilən şəxslərin də mövqeyini dərc etməyə hazırıq.