Qanunsuz tikinti işləri “Paradise” klubun işçiləri tərəfindən aparılıb.

Bakının Binəqədi rayonundakı 115 nömrəli tam orta məktəbə məxsus 90 kv. m torpaq sahəsi qanunsuz zəbt olunub və ərazi hasarlanıb.

Bakı Şəhəri üzrə Təhsil İdarəsi tərəfindən həyata keçirilmiş operativ araşdırma zamanı məlum olub ki, qanunsuz tikinti işləri “Paradise” klubun işçiləri tərəfindən aparılıb.

Təhsil Nazirliyindən verilən məlumata əsasən, faktla bağlı Bakı Şəhəri İcra Hakimiyyətinə müraciət edilib və əraziyə baxış keçirildikdən sonra qanunsuz tikinti sökülüb.

Qeyd edək ki, Prezident İlham Əliyev 11 avqust 2014-cü il tarixində Binəqədi rayonundakı 115 nömrəli tam orta məktəbin əsaslı təmir və yenidənqurma işlərindən sonrakı vəziyyətilə tanış olub. Dövlət başçısının tapşırıqlarına uyğun olaraq, əsaslı şəkildə yenidən qurulmuş 1380 şagird yerlik məktəbdə təmir işləri yüksək standartlara uyğun həyata keçirilib. Təhsil müəssisəsinin bir hektarlıq həyətyanı sahəsində də müvafiq abadlıq və quruculuq işləri aparılıb, yaşıllıqlar salınıb.

Təhsil Nazirliyi bildirir ki, təlim-tərbiyə müəssisələrinin ərazilərinin zəbt olunmasına cəhd edən vətəndaşlar birmənalı şəkildə qəbul etməlidir ki, bu cür qeyri-sağlam tendensiya təhsil alanların Konstitusiya hüquqlarının pozulmasına səbəb olur.

“Təhsil müəssisələrinin ərazilərinin zəbt olunması hallarına qarşı Azərbaycan Respublikası qanunvericiliyi çərçivəsində ciddi mübarizə tədbirləri davam etdiriləcəkdir”, - nazirlik qeyd edib.