“Xalq Cəbhəsi hakimiyyətə gəlsə, daha çox əxlaqsızlıq edəcək”.
“Ölkə.Az” xəbər verir ki, bu sözləri 15 mart tarixində saytımıza açıqlama verən Nemət Pənahlı deyib. Amma 18 mart tarixində “Haqqın.az” saytına müsahibə verən Nemət Pənahlı bu açıqlamasını təkzib edib və sözünün arxasında durmayıb.
“Siz "Ölkə.Az"-a istinadla müsahibəmi yayımlamısınız. Amma mən elə bir açıqlama verməmişəm. Ölkədəki siyasi vəziyyətlə bağlı nə “Ölkə.Az”a , nə də digər saytlara açıqlama verməmişəm. Bu səbəbdən təkzib yayımlamağınızı tələb edirəm. Mənim bütün sözlərim təhrif edilib”, - deyə Pənahlı haqqin.az saytına açıqlamasında deyib.

Amma bu günə qədər də Nemət Pənahlının açıqlamasının səs yazısı bizdə mövcuddur. Sadəcə etika xatirinə bunu yayımlamırıq. Amma əgər Nemət Pənahlı bu hərəkətinə davam etsə, dediklərini təkzib etsə, açıqlamasının arxasında durmasa, səs yazısını yayımlamaq məcburiyyətində qalacağıq. Özünü Azadlıq Hərəkatının qurucularından biri sayan, Azadlıq Hərəkatının lideri adlandıran bir siyasətçi verdiyi açıqlamanın arxasında dura bilmirsə, sözünü təkzib edirsə, ona insanların inanması, arxasınca getməsi mümkündürmü?