Azərbaycan Respublikası Prezidentinin 29 dekabr 2000-ci il tarixli 597 saylı sərəncamı ilə Azərbaycan Respublikasını erməni təcavüzündən müdafiə edərkən və 20 Yanvar hadisələri zamanı əlil olmuş şəxslərin sosial müdafiəsini gücləndirmək məqsədilə 1-ci qrup əlillərə 70 min manat (indiki 14 manat), 2-ci qrup əlillərə 60 min manat (12 manat), 3-cü qrup əlillərə isə 50 min manat (10 manat) müavinət ayrılması təsbit olunub. Göstərilən məbləğlərin üçdən iki hissəsinin dövlət büdcəsinin vəsaiti hesabına, qalanının isə “Əlillərin Sosial Müdafiəsi Fondu”nun hesabına ödənilməsi də qərara alınıb. 24 avqust 2002-ci il tarixli 765 saylı Prezident fərmanı ilə “Əlillərin Sosial Müdafiəsi Fondu” sözləri “Dövlət Sosial Müdafiə Fondu” sözləri ilə əvəz olunub. Lakin DSMF nəinki müharibə əlillərinə hesabından vəsait ödəyir, əksinə, büdcədən ayrılan cüzi vəsaiti də mənimsəyir.

Prezidentin 26 dekabr 2001-ci il tarixli 613 saylı “Kommunal, nəqliyyat və digər xidmətlər üzrə güzəştlərin müavinətlərlə əvəz olunmasının təmin edilməsi haqqında” fərmanının 1-ci bəndinin 1-ci abzası ilə Azərbaycan Respublikasının ərazi bütövlüyünün və Konstitusiya quruluşunun müdafiəsi zamanı əlil olanlara, 20 Yanvar, Böyük Vətən Müharibəsi əlillərinə, Çernobıl qəzasının nəticələrini aradan qaldırarkən əlil olmuş hərbi qulluqçulara ayrılan 130 min manatlıq (indiki 26 manat) müavinət də Qarabağ əlillərinə şamil edilmir. DSMF Nazirlər Kabinetinin qərarı ilə hərbi qulluqçu Qarabağ əlillərinə ayrılan müavinətin kəsildiyini bildirərək, müavinəti mənimsəyir.

Ha deyirsən ki, NK-nın qərarı Prezident fərmanını ləğv edə bilməz, yenə də Konstitusiyanın 149-cu maddəsinə zidd olaraq, baş nazirin prezidentdən “üstünlüyü” analoqsuzluğuna son qoyulmur. Bu absurdluq Prezidentin 22.01.2007-ci il tarixli 514 saylı fərmanı ilə 26.12.2001 tarixli 613 saylı fərmanın 1-ci bəndinin 6-cı abzasının qüvvədən düşmüş hesab edilməsindən qaynaqlanır. Prezident əmək pensiyası alan Qarabağ, Əfqanıstan savaşı veteranlarına ayrılan 55 min manatlıq (indiki 11 manat ) aylıq müavinətin ləğv edilərək sosial müavinətlə əvəz olunmasına qərar verib( Hazırda bu sosial müavinətin məbləği 55 min manatdır). Nazirlər Kabineti də Prezidentin bu fərmanının icrasını təmin etmək məqsədi ilə “Hərbi qulluqçuların pensiya təminatı haqqında” qanuna əsasən, pensiya alan hərbi qulluqçuların pensiyalarına əlavə edilən 11 manatın ödənilməsinin dayandırılmasına qərar verib. Elə bu qərarı bilərəkdən və ya bilməyərəkdən hərbi qulluqçu Qarabağ əlillərinə də şamil edən DSMF Konstitusiyanı pozmaqda davam edir. Guya Qarabağ əlillərinə kommunal, nəqliyyat və digər xidmətlər üzrə güzəştlərin əvəzinə verilən kompensasiya sosial müavinətdir və əmək pensiyası alanlara şamil edilmir. Axı, onda Prezidentin 26.12.2001 tarixli 613 saylı fərmanı qüvvədən düşmüş sayılmalıdır! Fərman isə qüvvədədir və eyni zamanda bu 26 manatlıq cüzi kompensasiya məbləğində Qarabağ əlillərinə sosial müavinət təyin olunması nəzərdə tutulmayıb.

Əldə etdiyimiz bilgiyə görə, cəmi 450 nəfər civarında sosial müavinətçi Qarabağ əlili var ki, onlara da bu 26 manatdan 3-4 dəfə çox sosial müavinət verilir. Onu da vurğulayaq ki, Prezidentin 26 dekabr 2001-ci il tarixli 613 saylı fərmanında sosial pensiyaçılara, yəni sosial müavinətçilərə 25 min manat (indiki 5 manat) aylıq müavinətin ayrılmasının təsbit olunması da Qarabağ əlillərinin sözügedən aylıq müavinətlərinin “sosial müavinət” olmadığını doğrulayır. Amma...

“Əmma” budur ki, hələ də DSMF bil(mə)diyini edir, Qarabağ əlilləri cüzi müavinətdən məhrum edilir...
Məğrur BƏDƏLSOY \\hurriyyet.org\\