9-08-2019, 16:47 Oxunub: 270

Bayram namazının vaxtı, heyvan satışı və kəsim üçün ünvanlar

Bayram namazının vaxtı, heyvan satışı və kəsim üçün ünvanlar

QMİ müraciət yaydı; dövlət qurumları müqəddəs bayramla bağlı hərəkətə keçdi…
Avqustun 12-si müsəlmanların müqəddəs bayramlarından olan Qurban bayramıdır. Bununla əlaqədar Azərbaycanda avqustun 12-si və 13-ü qeyri-iş günüdür. Öncəki günlərin, yəni 10-11 avqust tarixlərinin də şənbə-bazar günlərinə təsadüf etdiyini nəzərə alsaq, ardıcıl olaraq 4 gün qeyri-iş günü olacaq. Həmin günlərdə qurbanlar kəsiləcək, imkansız insanlara yardımlar ediləcək, bayram namazı qılınacaq. Həmçinin dünyasını dəyişən insanların məzarlarını ziyarət etmək, qohumlarla bayramlaşmaq da bəyənilən əməllərdir.

Artıq Azərbaycanda Qurban bayramı namazının vaxtı açıqlanıb. Bayram namazı avqustun 12-si saat 08:00-da Bakının “Əjdərbəy” məscidində, saat 09:00-da isə “Təzəpir” məscidində qılınacaq. Eyni zamanda Azərbaycanın bütün məscidlərində bayram namazı qılınacaq.

Bu arada Qafqaz Müsəlmanları İdarəsi (QMİ) İslam dünyasının müqəddəs bayramlarından olan Qurban bayramı ilə bağlı tövsiyələrini açıqlayıb. Bildirilib ki, Azərbaycan üfüqündə Zül-hiccə ayının hilalının görünməsinə uyğun olaraq Qurban bayramı Zül-hiccənin 10-na, Miladi təqvimlə 12 avqust tarixinə təsadüf edir: “Qurban kəsmək əsasən Məkkədə Həcc ziyarətində olan zəvvarlara vacibdir. Digər yerlərdə isə imkanlı adamların qurban kəsmələri Allah-Təala yanında bəyənilmiş – müstəhəb əməllərdən hesab olunur. Qurban ətindən fəqir və kasıb ailələrə paylamaq gərəkdir ki, onlar bayram ab-havasını yaşasınlar – bu böyük savabdır. Qurban kəsilən heyvan sağlam və kök olmalıdır. Xəstə, arıq və qüsurlu heyvanlar qurbanlığa layiq və məqbul sayılmır. Qurban qoyun, keçi, öküz, inək və dəvə olmalıdır. Bu heyvanlar müəyyən yaş həddinə çatmalıdır. Keçi və qoyunun bir, öküz və inəyin iki, dəvənin isə beş ili tamam olmalıdır. Qurban ətinin satılması haramdır. Xırdabuynuzlu heyvan (qoyun, keçi) bir nəfər üçün kəsilməlidir. Bir neçə şəxs cəmləşib bir iribuynuzlu heyvanı qurban kəsə bilər. Yaxşı olar ki, bu zaman bölgü aparanda həmin şəriklər bir-birinə halallıq versinlər. Qurbanlıq əsasən üç hissəyə bölünür: bir hissəni qurban sahibi özünə götürə bilər, digər hissənin fəqir və kasıb ailələrə, üçüncü hissənin isə hədiyyə kimi qohum-əqrəbalara paylanması tövsiyə olunur. Qurbanlıq heyvan, şəriət qaydalarına uyğun olaraq kəsilərkən ”Bismillahi və billəhi vəllahu əkbər” deyilməlidir. Qurban duasının oxunması məsləhətdir. Tövsiyə edərdik ki, bu müqəddəs bayram günlərində qurbanların kəsilməsi baytarlıq və sanitariya qayda-qanunlarına ciddi əməl olunmaqla münasib yerlərdə icra edilsin. Həmçinin qurbanların azyaşlı uşaqların, habelə heyvanların gözü qarşısında kəsilməsi məsləhət deyil. Dünya müsəlmanlarının ən şərafətli bayramlarından olan, insanı öz Yaradanına yaxın edən Qurban bayramının sevincini valideyinlər, doğmalarla yanaşı, qaçqın, köçkün, kimsəsiz soydaşlarımıza, maddi sıxıntı çəkən insanlara da yaşatmaq, onu hamı ilə birgə könül xoşluğu ilə keçirmək savabdır. Qurban kəsməyə imkanı olmayanların Qurban günü ibadət və duaları da Allah-Təala yanında savab əməllərdəndir”.
Bayram namazının vaxtı, heyvan satışı və kəsim üçün ünvanlar
Qurban bayramı ilə bağlı aidiyyəti dövlət qurumları tərəfindən heyvanların satış və kəsim məntəqələri də müəyyənləşdirilib. Qida Təhlükəsizliyi Agentliyi, Kənd Təsərrüfatı və Daxili İşlər nazirlikləri tərəfindən əhalinin təhlükəsiz ət və ət məhsulları ilə təmin edilməsi istiqamətində həyata keçirilən tədbirlərin miqyası genişləndirilib. Bu barədə hər üç dövlət qurumu birgə məlumat yayıb. Məlumata görə, heyvanların kəsimi və satışı aidiyyəti dövlət orqanlarının müəyyən etdiyi yerlərdə həyata keçirilməli, sanitariya-gigiyena tələblərinə uyğun olmayan küçə, yol kənarları, məhəllələr, parklar və digər ictimai yerlərdə heyvan kəsimi və satışı, eyni zamanda baytarlıq arayışı olmadan iri və xırda buynuzlu heyvanların daşınması yolverilməzdir. Qurban bayramı ilə bağlı hər üç qurum gücləndirilmiş iş rejimində fəaliyyət göstərəcək.

Bayram günlərində heyvan kəsiminin müvafiq qaydada həyata keçirilməsini təmin etmək üçün respublika üzrə 44 stasionar və 30 çadır tipli kəsim məntəqəsi vətəndaşların ixtiyarına veriləcək. Həmin kəsim məntəqələrinin ərazilər üzrə ünvanları artıq media vasitəsilə ictimaiyyətin diqqətinə çatdırılıb. Mütəxəssislərin metodiki tövsiyəsi ilə hazırlanmış çadır tipli kəsim məntəqələrində qurbanlıq heyvanların satışı ilə yanaşı, onların kəsimi, hazırlanması və digər xidmətlər yerli icra strukturları tərəfindən təmin ediləcək. Vətəndaşlardan xahiş olunub ki, bayram günlərində sağlamlığı şübhə doğuran heyvanlarla bağlı, eyni zamanda, küçə və yol kənarlarında antisanitar şəraitdə heyvan kəsimi və satışı müşahidə olunduqda Daxili İşlər Nazirliyinin “102″ Xidməti – Zəng Mərkəzinə, Qida Təhlükəsizliyi Agentliyinin 1003 ”Çağrı Mərkəzi”nə, Kənd Təsərrüfatı Nazirliyinin isə 1652 “Çağrı Mərkəzi”nə zəng edib məlumat versinlər.

Həmçinin bayram münasibətlə Kənd Təsərrüfatı Nazirliyinin dəstəyi ilə növbəti bayram yarmarkası da keçiriləcək. Bayram günlərində təşkil ediləcək qurbanlıq qoyunların satış yarmarkası ölkə ərazisində 30 fərqli nöqtəni əhatə edəcək. Satış yarmarkalarından 19-u paytaxt Bakıda təşkil olunacaq. “Kənddən Şəhərə” satış yarmarkasına 20 minə yaxın qurbanlıq qoyun çıxarılması planlaşdırılır. Qoyunların qiymətləri çəkilərinə uyğun olaraq 160, 170 və 180 manat dəyərində müəyyənləşdirilib.
Bayram namazının vaxtı, heyvan satışı və kəsim üçün ünvanlar
Məlum olduğu kimi, bayram günü bazarlarda uzun növbələr yaranır. Bu problemlə üzləşməmək üçün vətəndaşlar “Kənddən Şəhərə” saytına daxil olaraq 9 avqust saat 23:59-dək Bakı, Sumqayıt və Abşeron yarımadasındakı satış məntəqələrində onlayn şəkildə növbə götürə və alacaqları qurbanlıq qoyunları öncədən sifariş edə bilərlər. Sifariş qəbul edildikdən sonra vətəndaşın mobil telefonuna təsdiq bildirişi gələcək. Daha sonra vətəndaş yarmarkada xüsusi ayrılmış yerdə “Aqrar Tədarük və Təchizat” ASC-nin əməkdaşına yaxınlaşaraq telefonundakı təsdiq bildirişini göstərməklə növbə gözləmədən sifariş etdiyi qurbanlığı ala biləcək.

Bayram və istirahət günlərində sərnişin axınının artması ilə əlaqədar rahat və ucuz nəqliyyat vasitəsi kimi vətəndaşlarımızın üstünlük verdiyi dəmir yolunda da gücləndirilmiş iş rejiminə keçilib. “Azərbaycan Dəmir Yolları” Qapalı Səhmdar Cəmiyyətinin Sərnişin daşımaları Departamentinin kollektivi Qurban bayramı ilə əlaqədar gücləndirilmiş iş rejimində çalışır. Qurban bayramı günlərində sərnişin sıxlığının artması ilə əlaqədar ölkə daxilində hərəkət edən sərnişin qatarlarına hər gün tələbata uyğun olaraq əlavə vaqonların qoşulması təmin edilir. Bundan əlavə, bayramı günlərində Bakı-Gəncə-Bakı istiqamətində sərnişinlərin daşınmasına artan tələbatı təmin etmək məqsədilə 10 və 13 avqust tarixlərində əlavə qatar təyin edilib.

Bu günlər Azərbaycan polisi də gücləndirilmiş iş rejimində çalışacaq. DİN-in mətbuat xidmətindən verilən məlumata görə, bununla bağlı daxili işlər naziri, general-polkovnik Vilayət Eyvazov müvafiq əmr imzalayıb. Əmrə əsasən, DİN-in bütün orqan və hissələrinin şəxsi heyəti avqustun 12-dən 14-dək gücləndirilmiş iş rejimində çalışacaq. Bayram günləri respublika ərazisindəki strateji ərazilərdə, sərnişin daşıyan nəqliyyat vasitələrində, böyük su tutarlarında, habelə digər mühüm əhəmiyyətli obyektlərdə mühafizə tədbirlərinin daha da gücləndirilməsi nəzərdə tutulub.
Bayram namazının vaxtı açıqlandı Bayram namazının vaxtı açıqlandı Sosial Məscidlərdə bayram namazı qılınıb Məscidlərdə bayram namazı qılınıb Medeniyyet Bayram namazının vaxtı açıqlandı Bayram namazının vaxtı açıqlandı Medeniyyet Qurban bayramı münasibətilə qılınacaq bayram namazının vaxtı açıqlandı Qurban bayramı münasibətilə qılınacaq bayram namazının vaxtı açıqlandı Sosial Bayram namazının vaxtı açıqlandı Bayram namazının vaxtı açıqlandı Medeniyyet