“Holcim Azərbaycan” ASC-dən şikayətçi olan bir qrup şəxs mətbuata müraciət edib. Onların sözlərinə görə, “Holcim Azərbaycan” ASC uzun müddətdir ki, onları aldadır və səhmlərini verməkdən imtina edir.

“Biz aprel ayından bəri “Holcim”lə mübarizə aparırırq. Dəfələrlə təkliflərimizi bildirsək də, bizimlə razılaşmırlar. Şirkətin yüksək gəliri olsa da, bizim səhmlərimizi verməkdən imtina edirlər. Onların illik hesabatında göstərilir ki, şirkət kifayət qədər gəlirə malikdir. Lakin “Holcim”in Müşahidə Şurası bizə pul verməmək barəsində qərar çıxarıb”, – deyə şikayətçilər bildiriblər.

“Əlimizdə kifayət qədər əsas yoxdur. Lakin onların maxinasiyaları ilə bağlı olaraq bizim şifahi faktlarımız var. Bununla bağlı olaraq onlara xəbərdarlıq da etmişik. Amma bununla kifayətlənmək istəmirik. İsveçrə səfirliyinin önündə piket keçirmək üçün Bakı Şəhər İcra Hakimiyyətinə müraciət etməyi düşünürük”, – vətəndaşlar vurğulayıblar.

Şikayətçilərin sözlərinə görə, onlara çatmalı olan səhmlər şirkətin hesabatında da yer alıb: “Zavodun 86 faizi “Holcim”ə məxsus olsa da, digər 10 faizi “Azərinvest”in payına düşür. Digər faizlər səhmdarların haqqıdır ki, biz bu səhmlərdən məhrum olmuşuq. Zavodun öz hesabatında göstərilir ki, 94 milyon 880 min manat bölüşdürülməmiş mənfəət var. Bu da səhmdarlar arasında bölüşdürülməlidir. Lakin şirkətin borcu olduğunu bildirir və bizə düşən payı verməkdən imtina edirlər”.

“Sonuncu dəfə oktyabrın 22-də rəhbərliklə görüş keçirmişik. Onlar bizim təklifimizi qəbul etmədilər. Əvəzində bir daha görüşmək təklif etdilər. Biz isə onları məhkəmə ilə hədələyib ordan uzaqlaşdıq. 300-dən çox insanın haqqı tapdanıb. Sizin dəstəyinizə ehtiyacımız var”, – deyə səhmdarlar əlavə ediblər.

Məsələ ilə bağlı “Holcim Azərbaycan” ASC-nin İctimayyətlə əlaqələr şöbəsinin meneceri Rəna Tahirova AYNA-ya deyib ki, şikayətçilərlə dəfələrlə görüş keçirilib: “Onlara izah olunub ki, şirkətin kifayət qədər gəliri olmadığı üçün heç bir səhmdara dividend ödənilməyib. Şirkətin xarici borcları var və o borclar ödənilməlidir. Keçən il və ondan əvvəlki illərdə baş verən devalvasiya nəticəsində şirkətin borcları daha da artdı və belə bir vəziyyət meydana gəldi. Amma onlar bunu başa düşmək istəmirlər”.

R.Tahirova şikayətçilərin onlara təzyiq göstərdiklərini də vurğulayıb: “Onlar ya şirkətə təzyiq göstərmək istəyirlər, ya da bu hadisənin fonunda başqa səbəb dayanır. Sadəcə fakt yoxdur deyə, dəqiq heç nə demək mümkün deyil. Çünki onlara məhkəməyə getmələrini tövsiyə edirik, lakin getmək istəmirlər. Aprel ayından sonra məktub yazaraq narazılıqlarını bildiriblər və ondan sonra dəfələrlə görüş keçirilib, məsələ izah olunub. Lakin görüşlərdən dərhal sonra digər qruplar gəlir, təzyiq göstərir və proses bu şəkildə davam edir”.

“Hətta onlar səhmlərini satmq istədiklərini də deyiblər. Lakin biz onların səhmlərini ala bilmədiyimizi bildirmişik. Çünki bir səhmdarın səhmini ancaq başqa səhmdar ala bilər. Biz isə səhmdar deyil, şirkətik. Gəlirdən asılı olaraq səhmlərin ödəniləcəyi barədə məlumat da vermişik. Çünki əvvəlki illərdə şirkətin borcu yox idi və onların dividendləri vaxtı-vaxtında ödənilirdi. Əslində açıq səhmdar cəmiyyəti olaraq onların səhmlərini verməmək ən birinci bizim nüfuzumuza xələl gətirir”, – deyə “Holcim” sözçüsü əlavə edib.