“Meliorasiya və Su Təsərrüfatı”nın 1 milyonluq kranını “metallom”a veriblər - İTTİHAM

Əhməd Əhmədzadənin rəhbəri olduğu Meliorasiya və Su Təsərrüfatı ASC -nin Texnoloji İstehsalat Komplektləşdirmə İdarəsinin rəisi İlqar Əliyev tabeçiliyində çalışan işçilərə məcburi işdən çıxmaları üçün ərizə yazdırır.

Bu barədə Gununsesi.org-a adıçəkilən strukturda çalışan vətəndaşlar bildirib.

Onların sözlərinə görə, İlqar Əliyev Meliorasiya və Su Təsərrüfatı ASC sədrin maliyyə məsələləri üzrə Rafiq Aslanovun bacısı oğlu olduğundan, özünü cəzasızlıq mühitində hiss edir: “Bir neçə aydır ki, bu vəzifəyə təyinat alıb. Adam özünü özəl müəssisə rəhbəri kimi aparır. Xəstə övladı olan süpürgəçi qadını belə işdən çıxarır. Açıq şəkildə dayısına güvənir. Bizim Əhməd Əhmədzadədən heç bir narazılığımız yoxdur. O, insanları heç zaman incitmir. İlqar Əliyevdən əvvəlki rəhbərlər də normal insanlar olub. Bu adam özünü nə sayır, biz bilmirik. İşə təyin olunandan sonra büdcə hesabına özünün iş otağını təmir etdirdi. İş otağına bitişik hamam düzəltdirib. Ayrıca istirahət otağı yaradıb”.

Şikayətçilər sonda İlqar Əliyevin işdən azad etdiyi şəxslərin adlarını da təqdim edib: “Yelmar, Kamil, İlham, Taleh, Əlvan, Zabil, Gülbəniz. Rəhman, Ehtiram, Nərmin Səbinə, Amaliya, Hafiz, Əlfəddin, Tural, Rövşən, Şəfa və başqalarıdır”.

İlqar Əliyevlə bağlı işdən azad olunan şəxslərin müraciətindən sonra qısa araşdırma apardıq.

Məlum oldu ki, onun qanunsuz əməlləri bununla da bitməyib. O, fəaliyyətində ciddi korrupsiya əməllərinə yol verir.

Belə ki, o, idarənin balansında olan reys üzərində hərəkət edən kranı yararsız kimi sənədləşdirərək, satıb.

Halbuki, həmin kranın mövcud dəyəri 1 milyon manata yaxındır. Onun yarasız olması üçün Əmlak Məsələləri üzrə Dövlət Komitəsinin müvafiq strukturlarının rəyi və razılığı olmalıdır ki, o metal kimi satılsın.

Bundan başqa İlqar Əliyev idarənin elektirik sisteminin yenilənməsi işində də korrupsiya əməllərinə yol verir. Köhnə kabellər yenisi kimi sənədləşdirilir və ortada böyük vəsaitlər silinir.

Məsələ ilə bağlı İlqar Əliyevin mövqeyini öyrənməyə çalışsaq da, bu cəhdlərimiz fayda vermədi.

Mövzuya qayıdacağıq.