“İcra başçıları özlərini gözə soxmaq üçün, deyirlər ki, filan işi daxili hesabımızla etdik. Mən sual verirəm hansı daxili hesabınızına? İcra başçısının necə öz hesabı ola bilər? O, iş adamı deyil, sadəcə icracıdır”.
Bu sözləri sabiq deputat Ceyhun Osmanlı APA Tv-nin canlı efirində deyib. Daha sonra o, qeyd edib ki, bu daxili hesabların yaranması elə ən böyük korrupsiya mənbəyidir.

“Buradan da korrupsiya yaranır. Çünki, icra başçıları daxili hesabı yaratmaq üçün, təhsil şöbəsinə, səhiyyə təşkilatlarına və.s səlahiyyətində olan orqanlara müraciət edir. Yəni, başçı özünü yaxşı göstərmək üçün, onlardan müəyyən məbləğ tələb edir ki, ərazilərdə müəyyən işləri görsün. Elə bu vəziyyət də rüşvətin təməlini qoyur. Sabah da həmin təşkilatlar, bu məbləği toplamaq üçün, özündən kiçik orqanlardan onu ödəməyi tələb edir. Məsələn təhsil şöbəsi məktıb direktorlarından, direktorlar müəllimlərdən rüşvət tələb edir və bu virus kimi yayılmağa başlayır”,- deyə o, bildirib.