Masallı icra hakimiyyəti 55 gündür komada olan Qazimizlə maraqlanmır... - “Maddi imkanımız yetmir...”

Masallı rayon sakini 26 yaşlı Nurlan Əbilov Füzuli şəhərinin işğaldan azad edilməsi uğrunda gedən döyüşlərdə yaralanıb. O, 21 senytabrda II Qarabağ Müharibəsi başlamazdan əvvəl ordu sıralarına könüllü olaraq cəlb edilib.
Bu barədə “BakuPost”a məlumat verən qazimizin yaxınları bildirdilər ki, N.Əbilov baş nahiyyəsindən - beynin sol yarımkürəsindən yaralanıb:
“Hazırda M.Topçubaşov adına elmi cərrahiyə mərkəzində müalicə alır və bunadək artıq iki xəstəxana (Modul tipli yeni klinika və Bakı Sağlamlıq Mərkəzi) dəyişdirilib. 55 gündür ki, koma vəziyyətindədir.



Səhhətində hələ ki, heç bir irəliləyiş qeydə alınmayıb, hissiyyatı yoxdur. Həkimlər də heç bir məlumat vermir, ancaq deyirlər ki, vəziyyəti ağırdır. Bu gün Hərbi Hospitala yerləşdiriləcək. Biz istəyirik ki, daha yaxşı tibbi avadanlıqlarla təchiz olunmuş klinikalara, yaxud xarici ölkələrə transfer olunsun. Amma bunun üçün maddi imkanımız yetmir. Nurlanın ana-atası da dünyasını dəyişib, bacı-qardaşı da yoxdur. Özü də müharibəyə yollanmamışdan əvvəl Bakı Dövlət Universitetinin Coğrafiya fakültəsini bitirməyənə baxmayaraq, fəhlə işləyirdi. 2 övladı var. Ailəsi ilə birlikdə Masallının Şərəfə kəndində yaşayırdı. İndi çətin vəziyyətdə qalmışıq. İcra Hakimiyyətindən də maraqlanmayıblar. Nurlanın öz sağlamlığına qovuşmağı üçün vəsait lazımdır. Dövlət qurumlarından və ya imkanlı şəxslərdən yardım edən olsa, vəsaiti toplaya bilərik”.
Nurlan digər hərbçilərimiz kimi ölkəmizin ərazi bütövlüyü, xalqımızın firavan həyatı uğrunda canından keçməyə hazır olduğunu sübut etdi. Ona biganə qalmamaq və bu çətin günündə maddi-mənəvi dəstək göstərmək hər birimizin borcudur. Yardım göstərmək istəyənlər bu nömrə ilə - (050) 677 - 44-20 əlaqə saxlaya bilərlər.