Avrozona iqtisadiyyatı fonunda proqnozların son altı ayın minimumuna düşməsi EUR/USD məzənnəsinin ucuzlaşmasına səbəb olub.

Beləliklə, dollara olan tələbin artması da GBP/USD kimi digər aparıcı valyutaların dollara olan məzənnələrin ucuzlaşmasına səbəb olub.

Bununla yanaşı, Avrozona kimi inkişaf etmiş bazarda durğunluğun yaranmasından digər ölkələr də mənfi təsirlənəcək. Təhlillərə əsasən, avro və funt sterlinqdə ucuzlaşma müvafiq olaraq, 1.16, 1.36$-a kimi davam edə bilər.

Əlvan metallar bazarlarında da eyni tendensiya müşahidə edilir və bir unsiya üzrə qızılın qiyməti də 1790$-ın qırılması ilə 1775$-a kimi dəyər itirə bilər. Kriptovalyuta birjalarında dollara olan tələbin artması, bitkoində korreksiyanın davam etməsinə səbəb olur.

Burada da önəmli müqavimət səviyyəsi 35, dəstək səviyyəsi isə 33 min dollardır.

Maraqlıdır, dollara tələbin artması digər aparıcı valyutaların ucuzlaşmasına səbəb olubsa, manata təhlükə yarana bilər?

Cebhe.info-ya açıqlamasında iqtisadçı-ekspert Akif Nəsirli bildirib ki, hazırda beynəlxalq bazarda avro və funt-sterlinqin dollar qarşısında dəyər itirməsi Amerika və onun tərafdaşlığındakı zonaların pandemiya şəraitində inkişaf etməsi ilə bağlıdır:

“Həmin zonalar iqtisadiyyatı şəraitlərinə uyğun qura bilir. İngiltərə isə iqtisadiyyatını Amerika kimi səmərəli qura bilmir. Ona görə də bu iki zonanın valyutası, yəni funt- sterlinq və avro dollar qarşısında dəyər itirib. Azərbaycanın daxilində bəllidir ki, Azərbaycan manatı xarici məzənnə ilə tənzimlənmir. Azərbaycan manatı hökumətin iradəsi əsasında tənzimlənir. Yəni manat ölkənin daxilindəki valyuta bazarında tənzimlənir. Bu ilin 6 ayına görə Azərbaycan hökuməti təxminən 460 milyon dollar valyuta hərraca çıxarıb. Bu satış, yəni bazara dolların çıxarılması əslində manatın məzənnəsinin sabit saxlanması üçündür. Bu kursun qarşıdakı dövrdə də davam etdirilməsi gözlənilir. Azərbaycan hökumətinin hər hansı bir dəyişiklik etmək fikri yoxdur”.

Ekspert qeyd edib ki, hazırda Azərbaycan nefti az qalır 80 dollara çatsın:

“Bu isə o deməkdir ki, Azərbaycan hökuməti neft satışından yarıbayarı valyuta cəlb edib.

Azərbaycan hökumətinin hazırda tutduğu kursu davam etdirmək imkanı var. Ona görə də hesab edirəm ki, Azərbaycan manatına xaricdə cərəyan edən hadisələr təsir etməyəcək. Neftin qiyməti baha olduğuna görə Azərbaycan hazırkı valyuta kursunu davam etdirmək imkanına malikdir”.