“Mən narahatam ki, Azərbaycan-Ermənistan müharibəsi yenidən başlasın. Proses az qala buna doğru gedir. Səbəb də Ermənistandır. Nikol Paşinyanda iradə yoxdur ki, sülh müqaviləsi imzalasın, İrəvandakı revanşistlər isə sakitləşmirlər. Mənim fikrimcə, bu, əslində Ermənistan-Azərbaycan müharibəsinin anonsu deməkdir”. DİA.AZ xəbər verir ki, bunu Reyting.az-a professor Rüstəm Məmmədov Ermənistanın son təxribatlarını şərh edərkən deyib.

Professor hesab edir ki, Ermənistan-Azərbaycan arasındakı görüşlər əslində çətin dialoqdur: “Bu görüşlər heç zaman ciddi olmayıb. Çünki Ermənistan tərəfi ciddi mövqe tutmur. Daha çox öz maraqlarını hər şeydən üstün tutur, hətta bunu reallaşdırmaq mümkün olmasa belə. Baxın, onlar əvvəl demişdilər ki, Azərbaycanla danışıqlara, sülh müqaviləsi imzalamağa hazırıq. Amma Ermənistanda baş verən etiraz aksiyaları onu göstərir ki, ya Ermənistanda inqilab olmalı, vətəndaş müharibəsi başlamalıdır, ya da onlar bizi müharibəyə təhrik edəcəklər. Mən prosesləri bu cür görürəm. Hesab edirəm ki, Ermənistan tərəfi sülh sazişi imzalamaqdan uzaqdır. Onlar sadəcə, vaxtı uzadırlar”.

R. Məmmədov keçirilməsi ehtimal olunan İlham Əliyev, Nikol Paşinyan və Vladimir Putin görüşündən da danışıb:

“Müharibə bitdikdən sonra Azərbaycan tərəfi ortaya qəti mövqe qoyub, regionda sülhün yaranması və əməkdaşlığın başlanmasının alternativi olmadığını elan edib, bu istiqamətdə işləyir. Hazırda Rusiyanın başı Ukraynaya qarışıb. Mən bilmirəm ki, Moskva görüşündə nəsə ola bilər. Hadisələr göstərir ki, Nikol Paşinyanın yaxasını ölkəsində rahat buraxmırlar. O da sülh və danışıqlar mövzusuna ehtiyatla yanaşır. Ola bilsin ki, sülhə doğru gedəcəyi təqdirdə cəmiyyətin narazılığı ilə qarşılaşacağını güman edir. Amma həm də zamanla Paşinyan da zəifləyəcək. İndi hiss olunur ki, Paşinyanın sözünün bir qəpik qiyməti yoxdur. Onun gücü də zəifləyir. Qorxur ki, sülhə getsə, erməni cəmiyyəti ona qarşı çıxar. Amma sülhə getməməklə ölkəsini faciəyə doğru aparır”.